Vishwak Sen: ప్రభాస్ ‘సలార్’పై విశ్వక్‌ సేన్ సెటైర్

మాస్ క దాస్ విశ్వక్ సేన్ (Vishwaksen) తాజాగా న‌టిస్తోన్న చిత్రం గామి (GAAMI). కార్తీక్ కుల్ట్ క్రియేషన్స్‌పై కార్తీక్ శబరీష్ ఈ చిత్రాన్ని నిర్మించ‌గా, వి సెల్యులాయిడ్ సమర్పిస్తోంది. విద్యాధర్ కాగిత (Vidyadhar Kagita) దర్శకత్వం వ‌హించారు. ఈ సినిమాకు సంబంధించి ఇప్పటికే విడుదలైన టైటిల్ గ్లింప్స్ మంచి స్పందనను రాబట్టుకోగా.. తాజాగా మేకర్స్ హైదరాబాద్‌లో జరిగిన మీడియా సమావేశంలో ‘గామి’ విడుదల తేదీని ప్రకటించారు. విశ్వక్ సేన్ నటించిన ‘గ్యాంగ్స్ ఆఫ్ గోదావరి’ సినిమా విడుదల కావాల్సిన తేదీని ఈ సినిమాకు కేటాయించినట్లుగా చెబుతూ.. మార్చి 8న ‘గామి’ని ప్రపంచవ్యాప్తంగా గ్రాండ్‌గా విడుదల చేయబోతున్నట్లుగా మేకర్స్ ప్రకటించారు. విడుదల తేదీ ప్రకటన అనంతరం చిత్రయూనిట్ కాసేపు మీడియాతో ముచ్చటించారు. మీడియా అడిగిన ప్రశ్నలకు సమాధానమిస్తూ.. రీసెంట్‌గా వచ్చిన రెబల్ స్టార్ ప్రభాస్ ‘సలార్’ సినిమాపై విశ్వక్ సెటైర్లు వేశారు.

ముందుగా సినిమా గురించి విశ్వక్ సేన్ మాట్లాడుతూ.. ‘‘వారణాసిలో ‘గామి’ షూటింగ్ చేస్తున్నపుడు ఫోన్‌లో ఫలక్ నామా దాస్ టీజర్ ఎడిట్ చేస్తుండేవాడిని. దర్శకుడు విద్యాధర్ ‘గామి’ కోసం చాలా రీసెర్చ్ చేశాడు. సినిమాలోని ప్రతి ఎలిమెంట్ గురించి చాలా లోతుగా రాసుకున్నాడు. ఈ సినిమా మొదలు పెట్టినప్పుడే సమయం పడుతుందని తెలుసు. దాదాపు నాలుగున్నరరేళ్లు పాటు చేశాం. ఇంత సమయం ఇచ్చాము కాబట్టే మంచి సీజీని రాబట్టుకున్నాం. ఈ సినిమా కోసం చాలా కష్టపడ్డాం. అయితే అవేమీ గుర్తు లేవు. అయితే నిజంగానే కుంభమేళాలో ఒకరిద్దరు నేను అఘోర అనుకోని ధర్మం చేశారు. వారణాసిలో చలికి వణుకుతూ ఓ మూలకూర్చున్నప్పుడు ఓ ముసలామె భోజనం పెట్టి టీ ఇచ్చింది. సినిమా ట్రైలర్ చూశాను. మైండ్ బ్లోయింగ్‌గా వుంది. ప్రేక్షకుల నుంచి అద్భుతమైన స్పందన వస్తుందనే నమ్మకం వుంది. ‘గామి’ మార్చి 8న విడుదలవుతుంది.. ఖచ్చితంగా అందరినీ అలరిస్తుంది’’ అని తెలిపారు.

అనంతరం మీడియా అడిగిన ప్రశ్నలకు సమాధానమిస్తూ..

‘గామి’ సినిమా కోసం ఎలా ప్రిపేర్ అయ్యారు.. ఈ సినిమా వెనుక ఏదైనా స్ఫూర్తి నింపే కథ ఉందా? మీ డైలాగ్స్‌కు ఎందరో ఫ్యాన్స్ ఉన్నారు. ఇందులో ఎంజాయ్ చేసే డైలాగ్స్ ఉంటాయా?.. అని ఓ విలేఖ‌రి అడిగిన ప్ర‌శ్న‌కు విశ్వ‌క్ సేన్ మాట్లాడుతూ.. ‘ఈ మ‌ధ్య సైలెంట్‌గా ఉంటే ఎక్కువ డ‌బ్బులొస్తున్నాయి’ అని అన్నారు. దీంతో ‘స‌లార్‌’ను ఏమైనా స్ఫూర్తిగా తీసుకున్నారా? అని అడ‌గ‌గా.. నాలుగేళ్ల కింద‌టే స్ఫూర్తి పొందాం. ఈ మ‌ధ్య‌ సినిమాల క‌లెక్ష‌న్లు చూశాక.. ఇంకా నా డైలాగ్స్ త‌గ్గించ‌మ‌ని చెప్పాను.. అంటూ ప్రభాస్ ‘సలార్’పై విశ్వక్ సెటైర్ వేశారు. ‘సలార్’ సినిమాలో ప్రభాస్‌కు మొత్తంగా రెండున్నర నిమిషాలు మాత్రమే డైలాగ్స్ ఉన్నాయనే విషయం తెలిసిందే.