AakasamLo Oka Tara: దుల్క‌ర్ స‌ల్మాన్ మ‌రో తెలుగు సినిమా.. ‘ఆకాశంలో ఒక తార’
ABN , Publish Date - Jul 28 , 2024 | 01:12 PM
ఇండియ‌న్ సినీ ఇండ‌స్ట్రీ ప‌రిచ‌యం అక్క‌ర్లేని పేరు దుల్క‌ర్ స‌ల్మాన్. ఇప్ప‌టికే ఆయ‌న హీరోగా తెలుగులో ల‌క్కీ భాస్క‌ర్ చిత్రం రూపొందుతుండ‌గా తాజాగా మ‌రో తెలుగు సినిమా ‘ఆకాశంలో ఒక తార’ ప్రారంభమైంది.
మలయాళ సూపర్‌స్టార్ దుల్క‌ర్ స‌ల్మాన్ (Dulquer Salmaan). తెలుగు ప్రేక్ష‌కుల‌కే కాదు, ఇండియ‌న్ సినీ ఇండ‌స్ట్రీ ప‌రిచ‌యం అక్క‌ర్లేని పేరు. వైవిధ్య‌మైన పాత్ర‌లు, సినిమాల‌తో త‌న‌దైన ముద్రవేశాడు. తెలుగులోనూ మ‌హాన‌టి, సీతారామం వంటి సూప‌ర్ హిట్ చిత్రాల్లో అద్భుత‌మైన న‌ట‌న‌తో ఈయ‌న అల‌రించిన సంగ‌తి తెలిసిందే. రీసెంట్‌గా విడుద‌లైన పాన్ ఇండియా బ్లాక్ బ‌స్ట‌ర్ క‌ల్కి 2898 ఏడీలోనూ అతిథి పాత్ర‌లోనూ దుల్క‌ర్ అల‌రించారు.
ఇప్ప‌టికే ఆయ‌న హీరోగా తెలుగులో ల‌క్కీ భాస్క‌ర్ చిత్రం రూపొందుతుండ‌గా తాజాగా మ‌రో తెలుగు సినిమా ప్రారంభమైంది. టాలీవుడ్ అగ్ర నిర్మాణ సంస్థ గీతా ఆర్ట్స్ (Geetha Arts), స్వ‌ప్న సినిమా, లైట్ బాక్స్ మీడియా ( Light Box Media) సంయుక్త నిర్మాణంలో ప‌వ‌న్ సాధినేని (pavan sadineni ) ద‌ర్శ‌క‌త్వంలో ‘ఆకాశంలో ఒక తార’ అనే చిత్రం తెర‌కెక్క‌నుంది. అయితే ఈ రోజు దుల్క‌ర్ (Dulquer Salmaan) జ‌న్మ‌దినం సంద‌ర్భంగా మేక‌ర్స్ ఫ‌స్ట్ లుక్ రిలీజ్ చేశారు.
ఈ మూవీ పోస్ట‌ర్‌లో దుల్క‌ర్ స‌ల్మాన్ (Dulquer Salmaan) లుక్ చాలా సింపుల్‌గా ఉంది. ఓ రైతులా క‌నిపిస్తుండ‌గా.. అదే పోస్ట‌ర్‌లో ఓ అమ్మాయి స్కూల్ బ్యాగ్ వేసుకుని వెళుతుండ‌టాన్ని చూడొచ్చు. ఈ పోస్ట‌ర్‌ను చూస్తుంటే దుల్క‌ర్ మ‌రో డిఫ‌రెంట్ రోల్‌తో అల‌రించ‌బోతున్నార‌నే విష‌యం స్ప‌ష్ట‌మవుతోంది. ఆడియెన్స్‌లో ఓ క్యూరియాసిటీ క్రియేట్ అవుతుంది.