Varun Tej: వరుణ్‌ తేజ్‌నీ వదలడం లేదు...

మెగా హీరోలు (Mega Heros) వేదిక ఎక్కారంటే వారి మాటలతో ఆడిటోరియం దద్దరిల్లిపోవలసిందే. అయితే మెగా ప్రిన్స్‌ వరుణ్‌ తేజ్‌ (Varun Tej) మాత్రం తక్కువగా మాట్లాడతాడు. సినిమా ప్రచారంలోనూ కాస్త మొహమాట పడుతుంటాడు. అయితే ‘మట్కా’ (Matka) కోసం మాత్రం కొంత ఓపెన్‌ అయ్యాడు. ప్రమోషన్లు యాక్టివ్‌గా చేశాడు. ప్రీ రిలీజ్‌లో వరుణ్‌ చేసిన కామెంట్లు హాట్‌ టాపిక్‌గా మారాయి. ఎంత ఎత్తుకు ఎదిగినా, ఎవరూ మూలాల్ని మర్చిపోకూడదని, కెరీర్‌ ప్రారంభంలో సపోర్ట్‌ చేసిన వాళ్ల పేర్లు తలచుకోకపోతే ఎంత ఎదిగినా దానికి అర్థం ఉండదని అన్నారు. అయితే ఆ మాటలు పరోక్షంగా అల్ల్లు అర్జున్‌ని (Allu Arjun Fans) ఉద్దేశించి చేసిన వ్యాఖ్యలని పలువురు వైరల్‌ చేశారు. సోషల్‌ మీడియాలో రెండు రోజుల పాటు దీనిపై చర్చ నడిచింది. వరుణ్‌ మాట్లాడింది నిజమే అని కొందరు, కేవలం ప్రమోషన్ల కోసమే వరుణ్‌ ఇలా మాట్లాడాడని మరికొందరు పోస్ట్‌లు పెట్టారు. వరుణ్‌తేజ్‌ వ్యాఖ్యల్ని బన్నీ ఫ్యాన్స్‌ పర్సనల్‌గా ఫీలయ్యారు.

‘మట్కా’ విడుదల అవుతుంది కదా, చూసుకొందాం అంటూ రీట్వీట్లు కొట్టారు. ‘మట్కా’ విడుదలైంది. టాక్‌ అటుఇటుగా వచ్చింది. దాంతో బన్నీ ఫ్యాన్స్‌కు కావల్సినంత పని దొరికింది. వరుణ్‌తేజ్‌ గత సినిమాల్ని, ఫ్లాపుల్నీ, వాటి వసూళ్లను ఇప్పుడు షేర్‌ చేస్తున్నారు. వరుణ్‌ ఫ్లాప్‌ సినిమా కలక్షన్లు, బన్నీ తొలి రోజు వసూళ్లని మ్యాచ్‌ చేసి పోస్టులు షేర్‌ చేస్తున్నారు. వరుణ్‌ తేజ్‌ సినిమాలు సాధించిన మొత్తం వసూళ్లు బన్నీ సినిమా తొలి రోజు వసూళ్ల కంటే తక్కువంటూ అంకెలతో సహా లెక్క చెబుతున్నారు. నిజానికి బన్నీ ఫ్యాన్స్‌కి సైతం వరుణ్‌ పట్ల సాఫ్ట్‌ కార్నర్‌ ఉండేది. నాగబాబు బన్నీ ఫ్యాన్స్‌కి మధ్య గ్యాప్‌ ఉన్నా, వరుణ్‌ పై నెగిటీవ్‌గా మాట్లాడేవారు కాదు. కానీ ‘మట్కా’ ప్రీ రిలీజ్‌లో వరుణ్‌ తేజ్‌ చేసిన కామెంట్ల వల్ల ‘మట్కా’ సినిమా రిజల్ట్‌ని సైతం వాళ్లు పర్సనల్‌గా తీసుకొన్నారు. సినిమాకు పెద్ద నష్టమే చేశారు.