Allu Arjun: అల్లు అర్జున్‌ క్లారిటీ.. ఇకనైనా
ABN , Publish Date - Nov 20 , 2024 | 10:52 AM
తాజాగా నంద్యాల ఇష్యూ‌పై బన్నీ పూర్తి క్లారిటీ ఇచ్చారు. తన దృష్టిలో స్నేహం, అభిమానం అంటే ఏంటో చెప్పి ఎందుకు అప్పుడు అలా చేయాల్సి వచ్చిందో చెప్పారు. ఇంకేమన్నారంటే..
ఆంధ్రప్రదేశ్‌లో గత అసెంబ్లీ ఎన్నికల సమయంలో టాక్‌ ఆఫ్‌ ది స్టేట్‌గా మారిన కొన్ని విషయాల్లో ఐకాన్‌ స్టార్‌ అల్లు అర్జున్‌ నంద్యాల పర్యటన ఒకటి. తన స్నేహితుడు శిల్పా రవిచంద్ర కిశోర్ రెడ్డి కోసం బన్నీ నంద్యాల వెళ్లారు. అక్కడ ప్రచారం అయితే చేయలేదు కానీ.. ఎన్నికల సమయంలో ఆయన ఇంటికి వచ్చి, అభిమానులకు కరచాలనం చేయడం ప్రచారమే అనిపించుకుంది. అయితే అలా ఎందుకు వెళ్లాల్సి వచ్చింది అనే చర్చ అప్పట్లో గట్టిగా జరిగింది.
తాజాగా ఈ విషయంలో బన్నీ పూర్తి క్లారిటీ ఇచ్చారు. తన దృష్టిలో స్నేహం, అభిమానం అంటే ఏంటో చెప్పి ఎందుకు అప్పుడు అలా చేయాల్సి వచ్చిందో చెప్పారు. తన దృష్టిలో స్నేహం, అభిమానం ఎవరికైనా ఒకేలా ఉంటుందని, అది నంద్యాలలో ఉండే రవిచంద్ర కిశోర్ రెడ్డి అయినా, లేక తన కారు డ్రైవర్‌ అయినా ఒకటే అని అన్నారు. తన స్నేహం అలానే ఉంటుందని క్లారిటీ ఇచ్చారు.
అయితే తనకు ఎలాంటి రాజకీయ పార్టీతో సంబంధం లేదని, కేవలం స్నేహంతోనే నంద్యాల వచ్చానని అప్పట్లోనే బన్నీ చెప్పారు. ఇప్పుడు అన్‌స్టాపబుల్ వేదికగా మరోసారి స్పష్టత ఇచ్చినట్లు అయింది. ఈ విషయంలో ఇప్పటికీ అభిమానులు, నెటిజన్లు బన్నీ అప్పుడు చేసిన పని కరెక్ట్‌ కాదు అని అంటూనే ఉన్నారు. తాజా క్లారిటీతో అయినా ఆయన మీద విమర్శలు ఆగుతాయేమో చూడాలి.
ఓవైపు పవన్‌ కల్యాణ్ ‘జనసేన’ పార్టీ కూటమితో కలసి పోటీలోగా ఉండగా.. ప్రత్యర్థి అయిన వైఎస్‌ జగన్‌ మోహన్‌ రెడ్డి పార్టీకి చెందిన అభ్యర్థికి ప్రచారం చేయడానికి అల్లు అర్జున్‌ నంద్యాల వెళ్లాడని అప్పట్లో తీవ్ర ఆగ్రహాలు వ్యక్తమయ్యాయి. ఈ విషయంలో కేసులు కూడా నమోదయ్యాయి. అయితే కోర్టులో బన్నీకి ఊరట లభించింది. ఇప్పుడు ఈ క్లారిటీతో అభిమానులు, నెటిజన్ల నుండి కూడా ఊరట లభిస్తే సరి. ఎందుకంటే బన్నీ కొత్త సినిమా ‘పుష్ప: ది రూల్‌’ రాకకు ఇంకా 15 రోజులే ఉంది.