Kantara Chapter 1: ‘కాంతార చాప్టర్‌ 1’ విడుదల ఎప్పుడంటే..

కన్నడ నటుడు రిషబ్‌శెట్టి (Rishab Shetty) ప్రధాన పాత్రలో తెరకెక్కుతున్న చిత్రం ‘కాంతార చాప్టర్‌ 1’ (Kantara Chapter 1). 2022లో చిన్న సినిమాగా వచ్చిన ఈ చిత్రం పాన్‌ ఇండియా స్థాయిలో చక్కని విజయం అందుకొంది. రూ.16 కోట్ల బడ్జెట్‌తో రూపుదిద్దుకోగా రూ.450 కోట్లు వసూలు చేసిందని అంచనా. ఈ చిత్రానికి గాను ఆయన ఉత్తమ నటుడిగా జాతీయ అవార్డు అందుకున్నారు. ‘కాంతార’కు ప్రీక్వెల్‌గా ‘కాంతార: చాప్టర్‌ 1’ రానుండడంతో దీనిపై అంచనాలు ఏర్పడ్డాయి. రిషబ్‌శెట్టి స్వీయ దర్శకత్వంలో రూపుదిద్దుకుంటోన్న ఈ చిత్రం షూటింగ్‌ శరవేగంగా జరుగుతోంది. తాజాగా చిత్రబృందం రిలీజ్‌ డేట్‌ను ప్రకటించింది. వచ్చే ఏడాది అక్టోబర్‌ 2న ఈ సినిమాను విడుదల చేయనున్నట్లు ఓ పోస్టర్‌ రిలీజ్‌ చేసి తెలిపారు.  ఇందులో జయరామ్‌, జిషుసేన్‌ గుప్తా కీలక పాత్రధారులు. అజనీష్‌ లోకనాథ్‌ సంగీతం అందిస్తున్నారు. ఇతర వివరాలు త్వరలో వెల్లడిస్తారు. 

పీరియాడిక్‌ యాక్షన్‌ థ్రిల్లర్‌ ఫిల్మ్‌గా ఇది సిద్ధమవుతోంది. హోంబలే ఫిల్మ్స్‌ పతాకంపై విజయ్‌ కిరంగదూర్‌ దీనిని నిర్మిస్తున్నారు. జయరామ్‌ కీలక పాత్రలో కనిపించనున్నారు. కదంబుల కాలంలో సాగే ఆసక్తికర కథాంశంతో ఇది ఉండనుంది. దీనికోసం రిషబ్‌ కలరిపయట్టు యుద్ధ విద్యలో గత కొన్నాళ్లుగా కఠిన శిక్షణ తీసుకుంటున్నారు. ఈ సినిమాలో ఎన్టీఆర్‌ అతిథి పాత్రలో కనిపించనున్నారంటూ గత కొన్నిరోజులుగా వార్తలు వస్తున్నాయి. దీనిపై ఎన్టీఆర్‌ కూడా స్పందించారు. రిషభ్ ప్లాన్‌ చేస్తే తాను తప్పకుండా యాక్ట్‌ చేస్తానని అన్నారు.