Kavundampalayam: ‘గౌండంపాళెయం’ విడుదలకు సీఎం చొరవ చూపాలి

తన స్వీయ నిర్మాణంలో తెరకెక్కించిన ‘గౌండంపాళెయం’ (Kavundampalayam)చిత్రం విడుదలకు ముఖ్యమంత్రి స్టాలిన్‌ చొరవ చూపాలని దర్శక నటుడు రంజిత్ (Ranjith) విజ్ఞప్తి చేశారు. ఆయన హీరోగా నటించి దర్శకత్వం వహించిన చిత్రం ‘గౌండంపాళెయం’. ఈ నెల 5వ తేదీ విడుదల కావాల్సి ఉండగా, బెదిరింపుల కారణంగా చిత్రాన్ని విడుదల చేయలేదు.

దీనిపై ఆయన మాట్లాడుతూ.. ‘ఈ చిత్రం విడుదలకు కొన్ని రాజకీయ పార్టీలకు చెందిన నేతలు వ్యతిరేకిస్తూ, థియేటర్‌ యజమానులను బెదిరిస్తున్నారు. ఈ విషయంపై కోయంబత్తూరు పోలీసు కమిషనర్‌ కార్యాలయంలో ఫిర్యాదు చేశాం. ఈ సినిమా విడుదలలో నెలకొన్న సమస్యలను పరిష్కరించి సాఫీగా విడుదల చేసేందుకు చొరవ చూపించాలని ముఖ్యమంత్రి స్టాలిన్‌, సినిమాటోగ్రఫీ మంత్రిని కలిసి విజ్ఞప్తి చేయనున్నామ‌న్నారు.

కపట ప్రేమ, తల్లిదండ్రుల మనోవేదన వంటి అంశాలతో ఈ చిత్రాన్ని తెరకెక్కించాను. సినిమాను నిర్మించిన నాతో పాటు మిగిలిన నిర్మాతలంతా రైతులే. ఎవరూ కోటీశ్వరులు కాదు. నేను జన్మించిన నేలలో నా చిత్రం విడుదల చేయలేక పోవడం మనోవేదన కలిగిస్తుంది. నన్ను వ్యతిరేకించే వారికి ఈ చిత్రం విజయం సరైన సమాధానం చెబుతుంది. సెన్సార్‌ సర్టిఫికెట్‌ మంజూరు చేసిన తర్వాత కూడా విడుదల చేయలేక పోవడం బాధాకరం. రాష్ట్ర ప్రభుత్వ సహకారంతో ఈ సినిమాను త్వరలోనే విడుదల చేస్తాం’ అని పేర్కొన్నారు.