విజయ్ టీవీకే పార్టీ మహానాడు.. మ‌రో హీరో సైకిల్‌ యాత్ర

అగ్రహీరో విజయ్ (Vijay ) స్థాపించిన తమిళగ వెట్రి కళగం (టీవీకే) తొలి మహానాడు ఆదివారం భారీ స్థాయిలో నిర్వహించనున్నారు. ఇందులో పాల్గొనేందుకు కోలీవుడ్‌కు చెందిన పలువురు నటీనటులు సిద్ధమయ్యారు. ఈ నేప‌థ్యంలోనే హీరో సౌందరరాజా (Soundara Raja) మహానాడులో పాల్గొనేందుకు ఆయన చెన్నై నుంచి సైకిల్‌ యాత్ర చేపట్టారు. స్థానిక వడపళనిలోని ఆయన నడుపుతున్న చారిటబుల్‌ ట్రస్ట్‌ ‘మన్నుక్కుమ్‌ మక్కలుక్కుమ్‌ సమూగ నల అరకట్టలై’ (Mannukkum Makkalukkum) కార్యాలయం నుంచి సైకిల్‌పై బయలుదేరారు.

కోలీవుడ్‌లో ప్రముఖ నటుడుగా రాణిస్తున్న సౌందరరాజా... ‘సుందరపాండియన్‌’, ‘వరుత్తపడాద వాలిబర్‌ సంఘం’, ‘జిగర్‌తండా’, ‘పూజై’, ‘తెరి’, ‘ధర్మదురై’, ‘రెక్క’, ‘కత్తిసండై’, ‘బిగిల్‌’ వంటి అనేక చిత్రాల్లో నటించారు. ‘బిగిల్‌’ సినిమాలో హీరో విజయ్‌తో కలిసి నటించే సమయంలో ఆయనకు బాగా దగ్గరయ్యారు. ఆ తర్వాత విజయ్‌ రాజీయ పార్టీని స్థాపించనున్నట్టు ప్రకటించగానే ఆ పార్టీలో క్రియాశీలక కార్యకర్తగా మారిపోయారు. టీవీకే తరపు నిర్వహించే అనేక కార్యక్రమాల్లో పాల్గొంటూ తనవంతు సాయం చేస్తున్నారు. ఈ నేపథ్యంలో విల్లుపురం జిల్లా విక్రవాండి వేదికగా జరిగి టీవీకే మహానాడులో పాల్గొనేందుకు తమ చారిటబుల్‌ ట్రస్ట్‌ తరపున 250 మందితితో కలిసి చెన్నై నుంచి మహానాడు వేదిక వరకు సైకిల్‌ యాత్రగా వెళ్లారు. ఇందుకు సంబంధించిన ఫొటోలు, వీడియోలు సామాజిక మాధ్య‌మాల్లో బాగా వైర‌ల్ అవుతున్నాయి.