Jayam Ravi: భూమిక అక్కగా చేసింది.. ‘బ్రదర్‌’ మంచి ఫ్యామిలీ ఎంటర్‌టైనర్‌

ఎం.రాజేష్‌ దర్శకత్వలో తాను హీరోగా నటించిన ‘బ్రదర్‌’(Brother).. క్లీన్‌ అండ్‌ డీసెంట్‌ ఫ్యామిలీ ఎంటర్‌టైనర్‌ మూవీ అని ఆ చిత్ర హీరో జయం రవి (Jayam Ravi) వెల్లడించారు. స్క్రీన్‌ సీన్‌ మీడియా ఎంటర్‌టైన్మెంట్‌ నిర్మాణంలో రూపొందిన ఈ చిత్రం దీపావళి పండుగను పురస్కరించుకుని ఈ నెల 31వ తేదీ విడుదల చేస్తున్నారు. ప్రియాంకా అరుళ్‌ మోహన్ (Priyanka Mohan) హీరోయిన్‌. ఇతర పాత్రల్లో భూమిక, నట్టి నటరాజ్‌, సుబ్రమణియన్‌, రావు రమేష్‌, ఆశ్వథ్‌ కుమార్‌, శరణ్య పొన్‌వణ్ణన్‌, సీత, సతీష్‌, కృష్ణన్‌, వీటీవీ గణేష్‌, ఎంఎస్‌ భాస్కర్‌, సురేష్‌ చక్రవర్తి తదితరులు నటించారు. చిత్రం విడుదలను పురస్కరించుకుని తాజాగా మీడియా సమావేశం ఏర్పాటు చేశారు.

ఈ సంద‌ర్భంగా జయం రవి (Jayam Ravi) మాట్లాడుతూ.. ‘షూటింగ్‌ సమయంలో మేమంతా ఒక కుటుంబ సభ్యుల్లా కలిసిపోయాం. నిర్మాత సుందర్‌ ఎలాంటి లోటు లేకుండా చూసుకున్నారు. నా సినిమాలకు సంగీత దర్శకుడు హరీస్‌ జయరాజ్ ఎప్పుడూ మంచి హిట్‌ పాటలు ఇచ్చారు. ఇందులో నా అభిమానుల కోసం డ్యాన్స్‌ చేశాను. ఇప్పటికే ‘మక్క మిషి’ పాట హిట్‌ అయిందని, ఈ సినిమాలో అక్కా తమ్ముళ్ళ మధ్య ఓ ఎమోషనల్‌ సాంగ్‌ ఉందని రిలీజ్‌ తర్వాత ఆ పాట హిట్‌ లిస్టులో చేరుతుందన్నారు. ఈ సినిమాలో భూమిక నాకు అక్కగా నటించారు. వీటీవీ గణేష్‌ సినిమాలోనే కాదు సెట్స్‌లో ఉన్నా సందడే సందడి. ఈ సినిమాలో మరోకోణంలో ఆయన నటన ఉంటుంది. ‘బ్రదర్‌’ ప్రతి ఒక్కరూ చూసి ఎంజాయ్‌ చేయండి’ అని అన్నారు.

దర్శకుడు ఎం.రాజేష్‌ మాట్లాడుతూ.. నేను డైరెక్ష‌న్ చేసిన‌ చిత్రం థియేటర్‌లో విడుదలై మూడేళ్ళు అయింది. ‘ఈ దీపావళికి నేను దర్శకత్వం వహించిన చిత్రం విడుదల కావడం చాలా సంతోషంగా ఉంది. ఇందులో నటించిన ప్రతి ఒక్కరు తమ అత్యుత్తమ నటన కనబరిచారు. సినిమా చూసిన తర్వాత సెన్సార్‌ సభ్యులు ఒక్క కట్‌ కూడా చెప్పకుండా క్లీన్‌ సర్టిఫికెట్‌ ఇచ్చారు. ఇది ఎంతో సంతోషాన్ని, బలాన్ని ఇచ్చింది’ అన్నారు.