Bigg Boss8: నాగార్జున జోరు.. క‌న్న‌డ బ్యాచ్ బేజారు! నయని పావని ఎలిమినేట్‌

బిగ్ బాస్ తెలుగు సీజ‌న్ 8 (Bigg Boss Telugu 8) విజ‌య‌వంతంగా 60 రోజులు దాటి దూసుకుపోతుంది. ఇదివ‌ర‌క‌టి షోల‌కు వ‌చ్చిన ఆద‌ర‌ణ‌ను ద‌క్కించుకోలేక పోతున్న ఈ సీజ‌న్‌ను నిర్వాహ‌కులు రోజుకో కొత్త ఐడియాతో షోను జాకీ పెట్టి లేపుదామ‌ని ప్ర‌య‌త్నాలు చేస్తున్ప‌ప్ప‌టికీ కంటెస్టెంట్ల సేఫ్ ఆటల‌తో వారి ప్ర‌య‌త్నాలు బూడిద‌లో పోసిన ప‌న్నీరులా అవుతోంది. పైగా ఈసారి అచ్చ తెలుగు వారిక‌న్నా క‌న్న‌డ నాట నుంచి తీసుకు వ‌చ్చిన‌ బ్యాచ్ హంగామా ఎక్కువ‌గా ఉండ‌డం విమ‌ర్శ‌లు తెచ్చి పెట్టుకుంటుంది.

అయితే తాజాగా శ‌నివారం రాత్రి టెలికాస్ట్ అయిన ఎపిసోడ్‌లో నిఖిల్‌, య‌ష్మిల‌కు, నిఖిల్‌ని బూతులు తిట్టి ఆపై నేనేమి అన‌లేద‌న్న గౌత‌మ్‌కి కూడా నాగార్జున గ‌ట్టి క్లాసే పీకాడు. తాననాలనుకున్న మాటను సైలెంట్‌గా బయటకు వినిపించకుండా అనడంతో అది కాస్త ఇష్యూ అయ్యి పెద్ద ర‌చ్చే అయింది. య‌ష్మీ స‌మాధానం చెప్ప‌లేక త‌ల‌దించుకుంది. ఇక విష్ణు ప్రియ విషయంలో ఎప్పటిలాగానే స్పందించని నాగ్.. ఆమెను చిన్నపిల్లల మ‌న‌స్త‌త్వంగా భావించి ఏమీ అనకుండా వదిలేస్తున్నట్టు అనిపిస్తోంది. విష్ణు ప్రియ విష‌యంలో న‌బీల్‌కి క్లాస్ ప‌డిన కూడా అత‌ను ఇంకా ఆమెపైన సీరియ‌స్‌గానే ఉన్న‌ట్టు క‌నిపించింది. ఇక అవినాశ్, రోహిణీ, హరితేజల ఆటతీరు, హౌస్‌లో ఉంటున్న విధానం చాలా బాగుంద‌ని నాగార్జున అన్నాడు.

మొత్తానికి ఈ వారం నోరు జారి కాస్త బూతులు మాట్లాడిన కంటెస్టెంట్స్ కు గట్టిగానే ఇచ్చాడు నాగ్. కన్నడ బ్యాచ్ గా .. గ్రూప్ కట్టి.. హౌస్‌లో విలనిజం చూపిస్తున్న బ్యాచ్ నాగార్జున దెబ్బ‌కి ఉలిక్కి ప‌డింది. ఇక ఈ శనివారం ఎపిసోడ్‌లో టేస్టీ తేజ్ ను సేవ్ చేసిన నాగార్జున మిగతా వారిలో ఎవరు సేఫ్.. ఎవరు ఎలిమినేట్ అయ్యేది ఆదివారం ఎపిసోడ్‌లో రివీల్ చేస్తాన‌ని చెప్పుకొచ్చారు. కాగా ప్ర‌స్తుతం అందుతున్న స‌మాచారం మేర‌కు ఈ వారం న‌య‌ని పావ‌ని అల్రేడీ హౌజ్ నుంచి ఎలిమినేట్ అయిన‌ట్లు సామాజిక మాధ్య‌మాల్లో వార్త‌లు చ‌క్క‌ర్లు కొడుతున్నాయి. మ‌రోవైపు ఎప్పుడో ఎలిమినేట్ అయ్యే అవ‌కాశ‌మున్న‌ హరితేజను బిగ్ బాస్ కాపాడుతూ వచ్చిన‌ప్ప‌టికీ బిగ్ బాస్ తెలుగు సీజ‌న్ 8 (Bigg Boss Telugu 8) షో టీఆర్పీ పెంచ‌డం కోసం ఈసారి ఆమెను సీక్రెట్ రూమ్‌కు పంపించే అవ‌కాశాలు ఉన్నాయంటున్నారు.