సున్నా నుంచి 35 మార్కులు

నివేదా థామస్‌, ప్రియదర్శి, విశ్వదేవ్‌, గౌతమి, భాగ్యరాజా ప్రధాన పాత్రలు పోషించిన ‘35.. చిన్నకథ కాదు’ చిత్రం ట్రైలర్‌ను అక్కినేని నాగార్జున ఆదివారం విడుదల చేశారు. లెక్కల సబ్జెక్ట్‌తో ఇబ్బంది పడుతున్న ఓ స్టూడెంట్‌ను పరిచయం చేస్తూ ట్రైలర్‌ మొదలైంది. ఆ పిల్లాడి తల్లితండ్రులుగా నివేద, విశ్వదేవ్‌ నటించారు. కొడుకు భవిష్యత్‌ గురించి ఆందోళన చెందుతుంటారు. ఆ పిల్లాడిని టీచర్‌, క్లాసులో ఇతర స్డూడెంట్స్‌ ‘సున్నా’ అని పిలుస్తూ అవహేళన చేస్తుంటారు. ఆ కుర్రాడు సవాళ్లను అధిగమించి, 35 మార్కులతో ఉత్తీర్ణత సాధించడం ఈ చిత్రకథ. దర్శకుడు నందకిశోర్‌ ఈమని ఆసక్తికరంగా రూపొందించిన ఈ చిత్రం ఈ నెల 6న విడుదలవుతోంది. రానా దగ్గుబాటి, సృజన్‌ యరబోలు, సిద్దార్థ్‌ రాళ్లపల్లి నిర్మించారు.