మీ నిజస్వరూపమేంటో తెలిసింది

తన పెళ్లి డాక్యుమెంటరీలో పదేళ్లక్రితం నాటి సినిమాకు సంబంధించిన 3 సెకన్ల నిడివి దృశ్యాలను వాడుకునేందుకు రూ.10 కోట్లు అడిగిన తమిళ హీరో ధనుష్‌పై హీరోయిన్‌ నయనతార నిప్పులు

హీరో ధనుష్‌పై నయనతార విమర్శలు

తన పెళ్లి డాక్యుమెంటరీలో పదేళ్లక్రితం నాటి సినిమాకు సంబంధించిన 3 సెకన్ల నిడివి దృశ్యాలను వాడుకునేందుకు రూ.10 కోట్లు అడిగిన తమిళ హీరో ధనుష్‌పై హీరోయిన్‌ నయనతార నిప్పులు చెరిగారు. మీ నిజస్వరూపమేంటో తెలిసిందంటూ శనివారం ఘాటైన బహిరంగ లేఖ రాశారు. తన డాక్యుమెంటరీలో పదేళ్ళ క్రితం నటించిన ‘నానుమ్‌ రౌడీ దాన్‌’ సినిమాలోని సన్నివేశాలను వాడుకునేందుకు ఎన్‌వోసీ (నో అబ్జెక్షన్‌ సర్టిఫికేట్‌) కోసం రెండేళ్ళ నుంచి ప్రయత్నిస్తున్నామని, దీనికి అనుమతి ఇవ్వకపోగా, టీజర్‌లో మూడు సెకన్ల సన్నివేశాలను వాడుకున్నందుకు రూ.10 కోట్లు చెల్లించాలంటూ ధనుష్‌ డిమాండ్‌ చేశారని నయనతార ఆరోపించారు. కాగా, నయనతార జీవిత చరిత్ర ఆధారంగా ‘నయనతార: బియాండ్‌ ది ఫెయిరీ టేల్‌’ అనే పేరుతో నెట్‌ఫ్లిక్స్‌ డాక్యుమెంటరీని రూపొందించగా, ఈ నెల 18 నుంచి స్ట్రీమింగ్‌ కానుంది. ఇందులో నయనతార జీవిత విశేషాలతో పాటు ఆమె ప్రేమ, పెళ్ళి తదితర విషయాలను పొందుపరిచారు. నయనతార ఆమె భర్త సినీ దర్శకుడు విఘ్నేష్‌ శివన్‌తో కలిసి పనిచేసిన తొలి చిత్రమే ‘నానుమ్‌ రౌడీ దాన్‌’. ధనుష్‌ నిర్మాత. ఈ సినిమా చిత్రీకరణ సమయంలోనే వీరిద్దరూ ప్రేమించుకుని, పెద్దల అంగీకారంతో పెళ్ళి చేసుకున్నారు. ఈ డాక్యుమెంటరీలో ఆ సినిమా విశేషాలను చూపించాలని భావించగా, దానికి నిర్మాత ధనుష్‌ అనుమతి ఇవ్వలేదు.

నయన్‌కు హీరోయిన్ల మద్దతు...

నయనతారకు హీరోయిన్లు పార్వతి నాయర్‌, ఐశ్వర్యా రాజేష్‌, ఐశ్వర్య లక్ష్మి, శృతిహాసన్‌, అనుపమ పరమేశ్వరన్‌, నస్రియా, గౌరీ కిషన్‌, గాయత్రి శంకర్‌, నమిత కృష్ణమూర్తి, అభిరామి తదితరులు సోషల్‌ మీడియాలో మద్దతు తెలిపారు.