Janaka Aithe Ganaka: సుహాస్ కొత్త చిత్ర వివరాలివే..

అతి తక్కువ సినిమాలతోనే మంచి పేరు సంపాదించుకున్న సంస్థ దిల్ రాజు ప్రొడ‌క్ష‌న్స్‌. ఈ బ్యాన‌ర్‌పై వ‌చ్చిన ‘బ‌లగం’ సినిమా ఎంత సెన్సేష‌న‌ల్ స‌క్సెస్‌ను సొంతం చేసుకుందో అంద‌రికీ తెలిసిందే. ఇటీవల ఈ బ్యానర్ నుంచి వచ్చిన ‘ల‌వ్ మీ’ కూడా డిఫ‌రెంట్ ల‌వ్ స్టోరీ‌గా ప్రేక్షకులని అలరించింది. ఇప్పుడీ బ్యాన‌ర్‌ నుంచి వ‌స్తోన్న మరో చిత్ర అప్‌డేట్‌ని మేకర్స్ తెలియజేశారు. ఈ సినిమాకు ‘జనక అయితే గనక’ అనే టైటిల్‌ని ఖరారు చేశారు. శిరీష్ స‌మ‌ర్ప‌ణ‌లో హ‌ర్షిత్ రెడ్డి, హ‌న్షిత ఈ సినిమాను నిర్మిస్తున్నారు. వెర్స‌టైల్ యాక్ట‌ర్‌ సుహాస్ హీరోగా న‌టిస్తోన్న ఫ్యామిలీ ఎంట‌ర్‌టైనింగ్ కోర్టు డ్రామా ఫ‌స్ట్ లుక్‌ను మంగ‌ళ‌వారం మేక‌ర్స్ విడుద‌ల చేశారు.

ఈ ఫ‌స్ట్ లుక్‌ను గ‌మ‌నిస్తే.. సినిమా టైటిల్ ఉన్న ప‌ల‌క‌ను ప‌ట్టుకున్న హీరో సుహాస్ దాన్ని ఓర‌గా ఓ కంటితో చూస్తున్నారు. ఇంకా పోస్ట‌ర్‌లో న్యాయ‌దేవత బొమ్మ‌, చిన్న‌పిల్ల‌ల‌కు సంబంధించిన స్కూల్ బ్యాగ్‌, స్కూల్ బ‌స్‌, టెడ్డీ బేర్ బొమ్మ‌ల‌ను గ‌మ‌నించ‌వ‌చ్చు. హీరోగా వ‌రుస విజ‌యాల‌ను అందుకుంటున్న సుహాస్ మ‌రోసారి ‘జనక అయితే గనక’ వంటి డిఫ‌రెంట్ మూవీతో అల‌రించ‌టానికి సిద్ధ‌మ‌వుతున్నట్లుగా ఈ పోస్టర్‌తో తెలుస్తోంది. సందీప్ రెడ్డి బండ్ల దర్శకత్వంలో తెరకెక్కనున్న ఈ చిత్రంలో సుహాస్ సరసన సంకీర్తన విపిన్ హీరోయిన్‌గా నటించనుంది. సాయి శ్రీరామ్ సినిమాటోగ్ర‌ఫీ అందిస్తోన్న ఈ చిత్రానికి విజ‌య్ బుల్గానిన్ సంగీతాన్ని అందిస్తున్నారు. ఈ మూవీకి సంబంధించి మ‌రిన్ని వివ‌రాల‌ను త్వ‌ర‌లోనే మేక‌ర్స్ తెలియ‌జేయనున్నారు.