Lavanya Tripathi: లావణ్య త్రిపాఠి కొత్త సినిమా టైటిల్ ఇదే..
ABN , Publish Date - Dec 16 , 2024 | 01:50 AM
తనకు పెళ్లయినప్పటికీ, ఒక పెద్ద కుటుంబంలోకి కోడలిగా వెళ్లినప్పటికీ మంచి కథ అనిపిస్తే చాలు మెగా కోడలు లావణ్య త్రిపాఠి సినిమా చేయడానికి వెనుకాడటం లేదు. తాజాగా ఆమె మరో సినిమాకు సైన్ చేసింది. ఆదివారం ఆమె బర్త్ డే కావడంతో.. ఈ నూతన చిత్ర టైటిల్‌ని మేకర్స్ రివీల్ చేశారు.
వైవిధ్య‌మైన పాత్రలతో హీరోయిన్‌గా త‌న‌కంటూ ఓ ప్ర‌త్యేక‌మైన గుర్తింపు సంపాదించుకున్న హీరోయిన్ లావణ్య త్రిపాఠి. పెళ్లయిన తర్వాత కూడా ఆమె మంచి మంచి పాత్రలను ఎన్నుకుంటూ సినిమాలు చేస్తున్నారు. ఆదివారం బర్త్‌డే సందర్భంగా ఆమె నటిస్తోన్న నూతన చిత్ర టైటిల్‌ని మేకర్స్ రివీల్ చేశారు. దుర్గాదేవి పిక్చ‌ర్స్‌, ట్రియో స్టూడియోస్ ప‌తాకాల సంయుక్త నిర్మాణ సారథ్యంలో ప్రొడ‌క్ష‌న్ నెం.1గా రూపుదిద్దుకుంటోన్న చిత్రానికి ‘సతీ లీలావతి’ అనే టైటిల్‌ని ఖరారు చేశారు. ‘భీమిలీ కబడ్డీ జట్టు, ఎస్‌.ఎం.ఎస్‌(శివ మ‌న‌సులో శృతి)’ త‌దిత‌ర విభిన్న చిత్రాల ద‌ర్శ‌కుడు తాతినేని స‌త్య దర్శకత్వంలో తెరకెక్కనున్న ఈ చిత్రాన్ని నాగమోహ‌న్ బాబు.ఎమ్‌, రాజేష్‌.టి నిర్మించ‌నున్నారు.
ఆదివారం (డిసెంబ‌ర్ 15) లావణ్య పుట్టిన‌రోజు సందర్భంగా ఈ సినిమా టైటిల్‌ను అనౌన్స్ చేసిన చిత్ర యూనిట్, ఆమెకు జ‌న్మ‌దిన శుభాకాంక్ష‌ల‌ను తెలియ‌జేస్తూ టైటిల్ లుక్‌ పోస్టర్‌ని కూడా విడుదల చేశారు. ‘సతీ లీలావతి’ చిత్రంతో మ‌రోసారి డిఫ‌రెంట్ రోల్‌, ఎగ్జ‌యిటింగ్ క‌థాంశంతో మెప్పించ‌టానికి లావణ్య త్రిపాఠి సిద్ధ‌మ‌య్యారు. త్వరలోనే ఈ మూవీ షూటింగ్ ప్రారంభం కానుంది. మరిన్ని వివరాలను త్వరలోనే తెలియజేస్తామని నిర్మాతలు తెలిపారు. లావణ్య త్రిపాఠి కూడా సోషల్ మీడియా వేదికగా ఈ సినిమా కథ తనకు ఎంతో నచ్చిందని, తన మనసుకు చాలా దగ్గరైన చిత్రమిదని చెప్పుకొచ్చారు.
మిక్కీ జె.మేయ‌ర్ ఈ చిత్రానికి సంగీత సార‌థ్యం వ‌హిస్తుండ‌గా.. బినేంద్ర మీన‌న్ సినిమాటోగ్రాఫ‌ర్‌గా వ‌ర్క్ చేస్తున్నారు. ఉద‌య్ పొట్టిపాడు మాట‌లు అందిస్తున్న ఈ చిత్రానికి కోసనం విఠ‌ల్ ఆర్ట్ డైరెక్ట‌ర్‌గా, స‌తీష్ సూర్య ఎడిట‌ర్‌గా బాధ్య‌త‌ల‌ను నిర్వ‌హిస్తున్నారు. త్వరలోనే ఈ చిత్రానికి సంబంధించి మరిన్ని వివరాలను మేకర్స్ తెలియజేయనున్నారు.