Ram Charan: గేమ్ చేంజర్‌కు నార్త్‌ అంతా ఇదే సౌండ్ మోగాలి
ABN , Publish Date - Nov 09 , 2024 | 08:45 PM
గ్లోబ‌ల్ స్టార్ రామ్ చరణ్, స్టార్ డైరెక్ట‌ర్ శంకర్ కాంబినేష‌న్‌లో రూపొందుతోన్న భారీ బ‌డ్జెట్ పాన్ ఇండియా చిత్రం ‘గేమ్ చేంజర్’. ఈ చిత్ర టీజర్‌ని నవంబర్ 9న లక్నోలో మేకర్స్ విడుదల చేశారు. ఈ టీజర్ లాంచ్ కార్యక్రమంలో పాల్గొన్న టీమ్.. సినిమా గురించి ఏం చెప్పారంటే..
గ్లోబ‌ల్ స్టార్ రామ్ చరణ్ (Global Star Ram Charan), స్టార్ డైరెక్ట‌ర్ శంకర్ కాంబినేష‌న్‌లో రూపొందుతోన్న భారీ బ‌డ్జెట్ పాన్ ఇండియా చిత్రం ‘గేమ్ చేంజర్’ (Game Changer). ప్ర‌పంచ వ్యాప్తంగా తెలుగు, త‌మిళ, హిందీ భాష‌ల్లో 10 జ‌న‌వ‌రి, 2025న ఈ మూవీ గ్రాండ్ రిలీజ్‌కు రెడీ అవుతోంది. నవంబర్ 9న లక్నోలో ఈ మూవీ టీజర్ను మేకర్స్ విడుదల చేశారు. అభిమానుల మధ్య జరిగిన ఈ వేడుకకు భారీ స్పందన లభించింది. మెగాభిమానులు, ప్రేక్షకులు భారీగా ఈ వేడుకకు తరలివచ్చారు. ఈ కార్యక్రమంలో (Game Changer Teaser Launch Event)
Also Read- Game Changer: ‘గేమ్ చేంజర్’ టీజర్.. ఆ షాట్ అదిరింది
గ్లోబ‌ల్ స్టార్ రామ్ చరణ్ మాట్లాడుతూ.. మా కోసం ఇక్కడి వరకు వచ్చిన మీడియా, ఫ్యాన్స్ అందరికీ థాంక్స్. శంకర్ గారు ఈ రోజు ఇక్కడ లేరు. ఆయనని ఈ స్టేజ్‌పై మిస్ అవుతున్నాం. ఆయన ఫైనల్ పనుల్లో బిజీగా ఉన్నారు. ఆయనతో కలిసి పని చేయడం అదృష్టం. ఇండియాలో లక్నో చాలా పెద్ద నగరం. ఇక్కడ మనుషులు మనసులు కూడా చాలా పెద్దవి. మా గత చిత్రాన్ని ఇక్కడ పెద్ద మనసుతో ఆదరించారు. ఈ రోజు ఇక్కడ టీజర్ లాంచ్ జరగడం ఆనందంగా ఉంది. గేమ్ చేంజర్‌కు నార్త్‌ అంతా ఇదే సౌండ్ మోగాలని అన్నారు. హీరోయిన్ కియారా అద్వానీ మాట్లాడుతూ.. లక్నోలో మా చిత్ర ప్రయాణం ప్రారంభించడం ఆనందంగా ఉంది. నేను ఇక్కడకు రావాలని చాలా రోజుల నుంచి ఎదురు చూశాను. శంకర్ గారి వల్ల ఈ రోజు మేం ఇక్కడకు వచ్చాం. రామ్ చరణ్‌తో మళ్లీ పని చేయడం ఆనందంగా ఉందని తెలిపారు.
సినిమాలో ఓ కీలక పాత్రలో నటించిన ఎస్ జే సూర్య మాట్లాడుతూ.. ‘గేమ్ చేంజర్’ సినిమా టీజర్ను మాత్రమే చూశారు. ఇక అసలు సినిమా ముందుంది. ఈ రోజు శంకర్ గారు కూడా ఇక్కడకు రావాల్సి ఉంది. కానీ ఎడిటింగ్‌లో ఆయన బిజీగా ఉన్నారు. రామ్ చరణ్, శంకర్ కలిసి చేసిన ఈ చిత్రం అద్భుతంగా ఉండబోతోంది. గేమ్ చేంజర్ సంక్రాంతికి రాబోతోంది. అందరూ చూడండని కోరగా.. నటి అంజలి మాట్లాడుతూ.. గేమ్ చేంజర్‌లో నా పాత్ర విని వెంటనే ఓకే చెప్పాను. చాలా కొత్తగా ఉంటుంది. నాకు ఎంతో ఛాలెంజింగ్‌గా అనిపించింది. ఈ మూవీ ఒప్పుకోవడానికి రామ్ చరణ్ గారు, శంకర్ గారు, దిల్ రాజు గారు కూడా కారణం. సంక్రాంతికి ఈ చిత్రం రాబోతోంది. అందరూ చూడండని అన్నారు. నిర్మాత దిల్ రాజు మాట్లాడుతూ.. మా ప్రొడక్షన్‌లో ఇది 50వ చిత్రం. శంకర్ గారితో పని చేయాలని ఎప్పటి నుంచో అనుకున్నాను. పైగా అది రామ్ చరణ్‌తో అవ్వడం మరింత ఆనందంగా ఉందని తెలిపారు.