మా జోలికొస్తే మాకడ్డువస్తే మామూలుగా ఉండదు..

క్లాస్‌ కేరక్టర్‌ చేసినా మాస్‌ కేరక్టర్‌ చేసినా ఒదిగిపోయి నటించడం నాగార్జున ప్రత్యేకత. రానున్న సంక్రాంతికి ‘నా సామిరంగ’ అంటూ బాక్సాఫీస్‌పై యుద్ధానికి సిద్ధమయ్యారు నాగ్‌. విజయ్‌ బిన్ని దర్శకత్వంలో శ్రీనివాస్‌ చిట్టూరి నిర్మిస్తున్న ఈ చిత్రం ఈ నెల 14న సంక్రాంతి కానుకగా విడుదల కానుంది. ఈ సందర్భంగా ఈ సినిమాకు సంబంధించిన టైటిల్‌ సాంగ్‌, లిరికల్‌ వీడియోను చిత్రబృందం విడుదల చేసింది. ’మాజోలికొస్తే.. మాకడ్డువస్తే.. మామూలుగా వుండదు.. నా సామిరంగ.. ఈ గీత తొక్కితే.. మా సేత సిక్కితే.. మామూలుగా ఉండదు.. నా సామిరంగ’ అంటూ హీరో పాత్ర లక్షణాలను తెలియజేస్తూ చంద్రబోస్‌ రాసిన ఈ పాటను మాస్‌ మెచ్చేలా ఎం.ఎం.కీరవాణి స్వరపరిచారని, కాలభైరవ, రాహుల్‌ సిప్లిగంజ్‌ హై ఎనర్జీతో ఈ పాటను ఆలపించారని, నాగార్జున, అల్లరి నరేశ్‌,, రాజ్‌ తరుణ్‌లతోపాటు మూడు వందలమంది డాన్సర్స్‌ పాల్గొనగా దినేశ్‌ మాస్టర్‌ కొరియోగ్రఫీ అందించిన ఈ పాట సినిమాకే హైలైట్‌గా నిలుస్తుందని మేకర్స్‌ చెబుతున్నారు. స్నేహం, భావోద్వేగాల మేళవింపుగా రూపొందిన ‘నా సామిరంగ’ సంక్రాంతికి పర్‌ఫెక్ట్‌ మూవీ అని వారు అన్నారు. ఆశికా రంగనాథ్‌ కథానాయికగా నటిస్తున్న ఈ హైబడ్జెట్‌ చిత్రానికి కెమెరా: దాశరథి శివేంద్ర, కథ, మాటలు: ప్రసన్నకుమార్‌ బెజవాడ.