Hanu Kotla: ‘ఈశ్వర్’లో మూగపాత్రలో నటించిన అబ్బాయ్ హీరోగా..

‘ఈశ్వర్’ సినిమాతో రెబల్ స్టార్ ప్రభాస్‌తో పాటు వెండితెరకు పరిచయమైన నటుడు హను కోట్ల (Hanu Kotla). తొలి చిత్రంలో మూగ పాత్రలో ప్రభాస్ ఫ్రెండ్‌గా నటించిన హను కోట్ల.. ఆ తరువాత తన నటనను మరింత మెరుగుపరచుకోవాలనుకున్నారట. అలాగే దర్శకత్వ శాఖలో కూడా తన ప్రతిభను చూపించాలనుకున్నారట. కానీ అప్పటికే హైదరాబాద్‌లోని శ్రీ పొట్టి శ్రీరాములు తెలుగు యూనివర్సిటీలో ఉద్యోగరీత్యా బి.ఎ యాక్టింగ్, ఎం.ఎ. మీడియా డైరెక్షన్ కోర్సుల్లో విద్యార్థులకు బోధనా ఉపాధ్యాయుడిగా కొనసాగటం వల్ల ‘ఈశ్వర్’ తర్వాత ఎన్నో అవకాశాలు వచ్చినప్పటికీ తగిన పాత్ర కోసం ఎదురు చూశారని చెబుతున్నారు. అలా వెయిట్ చేస్తున్న తను ఇప్పుడు ‘ది డీల్’ (The Deal) అనే సినిమా ద్వారా హీరోగా పరిచయం కాబోతున్నారు. హను కోట్ల పుట్టినరోజు సందర్భంగా నిర్మాత దిల్ రాజు (Dil Raju) చేతుల మీదుగా ‘ది డీల్’ మూవీ మోషన్ పోస్టర్‌ను రిలీజ్ చేశారు.

హను కోట్ల విషయానికి వస్తే.. ఆధునిక తెలుగు నాటక రంగంలో నటుడిగా, దర్శకుడిగా అనేక ప్రయాణాలు చేసి రంగస్థలంపై ఎన్నో విజువల్ వండర్స్‌ని క్రియేట్ చేసిన తెలుగులో మొట్ట మొదటి నాటకత్రయం ‘ప్రతాపరుద్ర’ నాటకాన్ని మూడు భాగాలుగా ఆయన ప్రదర్శించి ప్రశంసలు అందుకున్నారు. నాటక రంగంపై జాతీయ, అంతర్జాతీయ సెమినార్‌లలో పాల్గొని నాటక అధ్యాపకులుగా నటన, దర్శకత్వంలో ఎంతో మందికి శిక్షణ ఇచ్చి ఎంతో పేరు తెచ్చుకున్నారు. అంతేకాక నాటక రంగంలో ఎన్నో ప్రయోగాలకు నాంది పలుకుతూ తన కళలకి గుర్తింపుగా రాష్ట్ర ప్రభుత్వం చేత అత్యంత ప్రతిష్ఠాత్మకమైన నంది అవార్డుని గెలుచుకున్నారు. ఇప్పుడు తనకున్న అపార అనుభవంతో ‘ది డీల్’ సినిమాని రూపొందించారు. ఈ సినిమాని అక్టోబర్ నెలలో దసరా పండుగ సందర్భంగా విడుదల చేసేందుకు సన్నాహాలు చేస్తున్నారు. (The Deal Motion Poster Launched)

సిటడెల్ క్రియేషన్, డిజిక్విస్ట్ సంయుక్తంగా ‘ది డీల్’ సినిమాని రెండు బాగాలు‌గా తెరకెక్కిస్తున్నారు. ఈ మూవీ మొదటి భాగం మొత్తం హైదరాబాద్‌లో, కొంత మలేషియాలో చిత్రీకరించామని, మలి భాగాన్ని మొత్తం మలేషియాలో షూటింగ్ చేసి చిత్రాన్ని కంప్లీట్ చేయనున్నట్లు యూనిట్ సభ్యులు వెల్లడించారు. ఈ చిత్రం మొదటి భాగం దసరాకి విడుదల చేయనున్నట్లు నిర్మాతలు ప్రకటించారు. ఈ చిత్రంలో హీరోయిన్‌లుగా చందన, ధరణి ప్రియా నటించగా రఘు కుంచె, రవి ప్రకాష్, మహేష్ పవన్, గిరి, వెంకట్ గోవాడ, శ్రీవాణి, సుజాత దిక్షిత్, సురభి లలిత తదితరులు ముఖ్య పాత్రలు పోషించారు. ఆర్.ఆర్. ధ్రువన్ సంగీతం అందించారు.