Dil Raju: సాంగ్ వేనుమా సాంగ్ ఇరుక్కు.. ఫైట్ వేనుమా ఫైట్ ఇరుక్కు.. సంక్రాంతికి!
ABN , Publish Date - Dec 22 , 2024 | 10:04 PM
‘సాంగ్ వేనుమా సాంగ్ ఇరుక్కు.. ఫైట్ వేనుమా ఫైట్ ఇరుక్కు.. సంక్రాంతికి సూపర్ హిట్ ఇరుక్కు..’ అని అన్నారు నిర్మాత దిల్ రాజు. గ్లోబల్ స్టార్ రామ్ చరణ్‌తో ఆయన నిర్మించిన ‘గేమ్ చేంజర్’ మూవీ జనవరి 10న ప్రపంచవ్యాప్తంగా గ్రాండ్‌ విడుదలకు సిద్ధమవుతోంది. ఈ సందర్భంగా అమెరికాలో ప్రీ రిలీజ్ వేడుకను నిర్వహించారు. ఈ కార్యక్రమంలో దిల్ రాజు ‘గేమ్ చేంజర్’ గురించి ఆసక్తికర విషయాలను తెలిపారు.
గ్లోబల్ స్టార్ రామ్ చరణ్ హీరోగా, కియారా అద్వానీ హీరోయిన్‌గా ఎస్.శంకర్ దర్శకత్వంలో తెరకెక్కిన ‘గేమ్ చేంజర్’ సినిమా జనవరి 10న విడుదలయ్యేందుకు రెడీ అవుతోంది. సంక్రాంతికి రాబోతోన్న ఈ సినిమాను శ్రీమ‌తి అనిత స‌మ‌ర్ప‌ణ‌లో శ్రీవెంకటేశ్వర క్రియేషన్స్, జీ స్టూడియోస్, దిల్ రాజు ప్రొడక్షన్ బ్యానర్స్‌పై దిల్ రాజు, శిరీష్ అన్‌కాంప్ర‌మైజ్డ్‌గా నిర్మిస్తున్నారు. చిత్ర ప్రమోషన్స్‌లో భాగంగా ఈ మూవీ ప్రీ రిలీజ్ వేడుకను ఛరిష్మా డ్రీమ్స్ రాజేష్ కల్లెపల్లి ఆధ్వర్యంలో డల్లాస్‌లో గ్రాండ్‌గా నిర్వహించారు. ఈ కార్యక్రమానికి సుకుమార్ ముఖ్య అతిథిగా హాజరయ్యారు.
ఈ కార్యక్రమంలో నిర్మాత దిల్ రాజు మాట్లాడుతూ.. ‘‘డల్లాస్‌లో ఈ ఈవెంట్ గురించి రాజేష్‌తో మాట్లాడాం. అద్భుతంగా ఆర్గనైజ్ చేశారు. ఈవెంట్ గురించి అంతా మాట్లాడుకుంటున్నారు. 1998లో ‘ఒకే ఒక్కడు’ సినిమాతో శంకర్‌గారితో మా జర్నీ మొదలైంది. శంకర్ గారు, చంద్రబాబు గారి చేతుల మీదుగా వంద రోజుల షీల్డ్ తీసుకున్నాం. శంకర్ గారు నిర్మించిన ‘వైశాలి’ మూవీని తెలుగులో మేమే రిలీజ్ చేశాం. అలా శంకర్ గారితో జర్నీ చేస్తున్న మేం ఇలా ‘గేమ్ చేంజర్’ను నిర్మించాం. మా కో డైరెక్టర్ ద్వారా శంకర్ గారు మాతో సినిమా చేయాలని, తెలుగు సినిమా చేయాలని అనుకుంటున్నారని తెలిసింది. అప్పుడే ‘ఆర్ఆర్ఆర్’ షూట్‌లో రామ్ చరణ్ ఉన్నారు. అప్పుడు ఈ కథ ఆయనకు చెప్పడం, నచ్చడం అలా జర్నీ మొదలైంది. మా బ్యానర్‌లో ఇది 50వ సినిమా. ఇంత పెద్ద బడ్జెట్‌తో నేను ఎప్పుడూ సినిమాలు తీయలేదు. కరోనా వల్ల కాస్త ఆలస్యమైంది. ‘డోప్’ సాంగ్‌ను ముందుగా నేను ఫోన్‌లో చూశా. ఈ పాటను డల్లాస్‌లో రిలీజ్ చేస్తున్నామని తెలిసి నాకు చాలా హ్యాపీగా అనిపించింది. ఈ పాటను చూసినప్పుడు నాకు కంట్లోంచి ఆనందభాష్పాలు వచ్చాయి.
గ్లోబల్ స్టార్ రామ్ చరణ్ వల్లే ఈ సినిమా ఈ స్థాయికి వచ్చింది. నేను చిరంజీవిగారి చిత్రాలను ఆడియెన్‌గా చూసి ఎంజాయ్ చేశా. కానీ కళ్యాణ్‌గారి ‘తొలిప్రేమ’ సినిమాతో డిస్ట్రిబ్యూటర్‌గా ఎంజాయ్ చేశాను. కళ్యాణ్ గారితో సినిమా తీయడానికి నాకు చాలా టైం పట్టింది. మెగా ఫ్యామిలీతో ఉన్న బాండింగ్‌తో ‘ఎవడు’ చేశాం. అది రిలీజై 11 ఏళ్లు అవుతోంది. ఇప్పుడు ‘గేమ్ చేంజర్’ మళ్లీ సంక్రాంతికి రాబోతోంది. ఈ సారి మామూలుగా కొట్టడం లేదు. గట్టిగా కొట్టబోతోన్నాం. శంకర్ గారి పాటలు, ఫైట్లు సెల్ ఫోన్‌లలో చూస్తే ఫీలింగ్ రాదు. వాటిని బిగ్ స్క్రీన్‌పైనే చూడాలి. ప్రతీ సాంగ్‌ను శంకర్ గారు అద్భుతంగా డిజైన్ చేసుకుంటారు. ‘రా మచ్చా’ పాటను వైజాగ్, అమృత్ సర్‌లో 300 మందితో షూట్ చేశారు. ‘నానా హైరానా’ పాట కోసం ప్రయోగాలు చేశారు. ఆ పాటను న్యూజిలాండ్‌లో షూట్ చేశారు. ‘జరగండి’ పాట లీక్ అయింది. అందుకే హడావిడిగా రిలీజ్ చేశాం. కానీ శంకర్ గారు సంతృప్తి చెందలేదు. ఆ పాట ఏంటో మీకు థియేటర్లో తెలుస్తుంది. ‘సాంగ్ వేనుమా సాంగ్ ఇరుక్కు.. ఫైట్ వేనుమా ఫైట్ ఇరుక్కు.. సంక్రాంతికి సూపర్ హిట్ ఇరుక్కు..’.
రామ్ చరణ్, సూర్య మధ్య వచ్చే సీన్లు నెక్ట్స్ లెవెల్లో ఉంటాయి. రెండు రాష్ట్రాల్లో జరిగే ప్రస్తుత రాజకీయ అంశాలు చాలా కనిపిస్తాయి. కానీ ఇవన్నీ శంకర్‌గారు నాలుగేళ్ల క్రితమే రాసుకున్నారు. అవి ఇప్పుడు రెండు తెలుగు రాష్ట్రాల్లో జరుగుతున్నాయి. తమన్ మంచి సంగీతాన్ని ఇచ్చాడు. శంకర్ గారి శిష్యుడని అనిపించుకుంటాడు. నా వెన్నంటి ఉండి నడిపిస్తున్న టీంకు థాంక్స్. శంకర్ గారే మా అందరినీ ముందుకు నడిపిస్తూ వచ్చారు. ఓ తెలుగు సినిమాకు ఇలా మొదటిసారిగా ఇక్కడ ఈవెంట్ నిర్వహించి గేమ్ చేంజర్‌తో.. గేమ్ చేంజ్ చేశాం. సుకుమార్‌ని నేను పరిచయం చేయలేదు. మా ఇద్దరి జర్నీ ఒకేసారి ప్రారంభం అయింది. ఈ సంక్రాంతికి ‘గేమ్ చేంజర్’ పెద్ద హిట్ కాబోతోంది. ‘గేమ్ చేంజర్’తో పాటుగా ‘సంక్రాంతికి వస్తున్నాం’ తీసుకురమ్మని చిరంజీవిగారు, రామ్ చరణ్‌గారు సపోర్ట్ ఇచ్చారు. బాలయ్య బాబు ‘డాకు మహారాజ్’ చిత్రం కూడా రాబోతోంది. పండుగకు రాబోతోన్న అన్ని చిత్రాలు సూపర్ హిట్ అవ్వాలి’’ అని చెప్పుకొచ్చారు.