‘డాకు మహారాజ్‌’గా బాలకృష్ణ
ABN , Publish Date - Nov 16 , 2024 | 06:07 AM
నందమూరి అభిమానులతో పాటు, తెలుగు సినీ ప్రియులంతా ఎంతగానో ఎదురుచూస్తున్న చిత్రం పేరు ‘డాకు మహారాజ్‌’. బాబీ కొల్లి ఈ చిత్రానికి దర్శకత్వం వహిస్తున్నారు. సూర్యదేవర నాగవంశీ, సాయి సౌజన్య భారీ బడ్జెట్‌తో నిర్మిస్తున్నారు. ఇప్పటికే విడుదలైన ప్రచార చిత్రాలు విశేషంగా
నందమూరి అభిమానులతో పాటు, తెలుగు సినీ ప్రియులంతా ఎంతగానో ఎదురుచూస్తున్న చిత్రం పేరు ‘డాకు మహారాజ్‌’. బాబీ కొల్లి ఈ చిత్రానికి దర్శకత్వం వహిస్తున్నారు. సూర్యదేవర నాగవంశీ, సాయి సౌజన్య భారీ బడ్జెట్‌తో నిర్మిస్తున్నారు. ఇప్పటికే విడుదలైన ప్రచార చిత్రాలు విశేషంగా ఆకట్టుకొని, సినిమాపై అంచనాలను రెట్టింపు చేశాయి. శుక్రవారం ఈ చిత్రం టైటిల్‌ని ప్రకటించి, టీజర్‌ని రిలీజ్‌ చేశారు మేకర్స్‌. ఈ చిత్రానికి ‘డాకు మహారాజ్‌’ అనే టైటిల్‌ని పెట్టారు. టైటిల్‌కి తగ్గట్టుగానే టీజర్‌ అద్భుతంగా ఉంది. ‘ఈ కథ రాజ్యం లేకుండా యుద్ధం చేసిన ఒక రాజుది. గండ్ర గొడ్డలి పట్టిన యమధర్మ రాజుది. మరణాన్ని వణికించిన మహారాజుది’ అంటూ ‘డాకు మహారాజ్‌’గా బాలకృష్ణను పరిచయం చేసిన తీరు అదిరిపోయింది. మునుపెన్నడూ చూడని సరికొత్త రూపంలో గుర్రంపై బాలకృష్ణ ఎంట్రీ ఇచ్చారు. టీజర్‌లోని ప్రతి ఫేమ్‌లో భారీతనం కనిపిస్తుంది. విజువల్స్‌ అద్భుతంగా ఉన్నాయి. తమన్‌ నేపథ్య సంగీతం టీజర్‌ని మరోస్థాయికి తీసుకెళ్లింది. ఈ సందర్భంగా దర్శకుడు బాబీ కొల్లి మాట్లాడుతూ ‘టీజర్‌ మీ అందరికీ నచ్చిందని భావిస్తున్నాను. మీరు చూసిన టీజర్‌లో డూపులు లేరు. బాలకృష్ణనే నిజంగా చేశారు. గుర్రం ఎక్కింది ఆయనే, నడిపింది ఆయనే, యుద్ధానికి వచ్చేది కూడా ఆయనే. మీరు చూసినవన్నీ ఒరిజినల్‌ షాట్స్‌. తమన్‌ అద్భుతమైన సంగీతం అందించారు’ అని అన్నారు. నిర్మాత సూర్యదేవర నాగవంశీ మాట్లాడుతూ ‘బాలకృష్ణని చాలా కొత్తగా చూపించాలని నేనూ, దర్శకుడు బాబీ ముందు నుంచి అనుకుంటున్నాం. టీజర్‌లో మీరు చూసింది చాలా చిన్నది. సినిమాలో ఇలాంటివి ఎన్నో ఉన్నాయి’ అని అన్నారు. సంగీత దర్శకుడు తమన్‌ మాట్లాడుతూ ‘బాబీ చాలా గొప్ప సినిమా తీశారు. బాలయ్యతో ఇది నా ఐదో సినిమా. ఆయనతో పని చేయడం సంతోషంగా ఉంది’ అని అన్నారు. ‘డాకు మహారాజ్‌’ చిత్రం సంక్రాంతి కానుకగా జనవరి 12న విడుదల కానుంది. బాలీవుడ్‌ నటుడు బాబీ డియోల్‌ ఈ చిత్రంలో కీలక పాత్ర పోషిస్తున్నారు.