పల్లెటూరి ప్రేమకథ

‘మేం ఫేమస్‌’ చిత్రంతో హీరోగా గుర్తింపు తెచ్చుకున్న సుమంత్‌ ప్రభాస్‌ కథానాయకుడిగా కొత్త చిత్రం ప్రారంభమైంది. సుభాష్‌ చంద్ర దర్శకత్వంలో రెడ్‌ పప్పెట్‌ ప్రొడక్షన్స్‌ నిర్మిస్తోంది. నిధి ప్రదీప్‌ కథానాయికగా పరిచయం అవుతున్నారు. జగపతి బాబు, రాజీవ్‌ కనకాల కీలకపాత్రలు పోషిస్తున్నారు. ఆదివారం పూజా కార్యక్రమాలతో చిత్రీకరణ మొదలైంది. ముహూర్తం షాట్‌కు హీరో శ్రీవిష్ణు క్లాప్‌ ఇచ్చారు. సురేశ్‌బాబు కెమెరా స్విచ్చాన్‌ చేశారు. దర్శకుడు శ్రీకాంత్‌ ఓదెల, మహేశ్‌బాబు పి. గౌరవ దర్శకత్వం వహించారు. నిర్మాత అల్లు అరవింద్‌ స్ర్కిప్ట్‌ను యూనిట్‌కు అందించారు. నిర్మాత సునీల్‌ నారంగ్‌ తదితరులు ఈ కార్యక్రమంలో పాల్గొన్నారు. ఈ సందర్భంగా సుమంత్‌ ప్రభాస్‌ మాట్లాడుతూ ‘యూత్‌ఫుల్‌ మ్యూజికల్‌ రొమాంటిక్‌ కామెడీగా ఈ చిత్రం తెరకెక్కుతోంది.

గోదావరి ప్రాంతంలోని పల్లెల అందాలను తెరపైన అద్భుతంగా ఆవిష్కరించబోతున్నాం. త్వరలో భీమవరంలో రెగ్యులర్‌ షూటింగ్‌ మొదలుపెడతాం’ అని తెలిపారు. ఇదో పల్లెటూరి ప్రేమకథ, ప్రేక్షకులకు సరికొత్త అనుభూతిని ఇస్తుందని దర్శకుడు చెప్పారు. ఈ చిత్రానికి నాగవంశీ కృష్ణ సంగీతం అందిస్తున్నారు. సినిమాటోగ్రఫీ: సాయిసంతోష్‌.