Karan Arjun: 30 ఏండ్ల త‌ర్వాత ‘కరణ్ అర్జున్’ రీ రిలీజ్.. ఫ్యాన్స్‌కు పూన‌కాలే
ABN , Publish Date - Oct 28 , 2024 | 04:11 PM
సల్మాన్ ఖాన్, షారూఖ్ ఖాన్ కలిసి నటించిన కరణ్ అర్జున్ అప్ప‌టికీ, ఇప్ప‌టికీ పాపులర్ బాలీవుడ్‌లో చిత్రాలలో ఒకటి. అలాంటి ఈ మూవీని తిరిగి 30 ఏండ్ల త‌ర్వాత థియేటర్లలో విడుదల చేయబోతున్నట్లు సల్మాన్ ఖాన్ సోమవారం ప్రకటించారు.
సల్మాన్ ఖాన్ (Salman Khan), షారూఖ్ ఖాన్ (Shah Rukh Khan) కలిసి నటించిన కరణ్ అర్జున్ (Karan Arjun) అప్ప‌టికీ, ఇప్ప‌టికీ పాపులర్ బాలీవుడ్‌లో చిత్రాలలో ఒకటిగా చ‌రిత్ర‌లో నిలిచిపోయింది. హృతిక్ రోషన్ (Hrithik Roshan) తండ్రి రాకేష్ రోషన్ (Rakesh Roshan) ఈ సినిమాకు దర్శకత్వం వహించిగా 1995లో థియేటర్లలో విడుదలై సంచ‌ల‌న విజ‌యం సాధించింది. క‌లెక్ష‌న్ల సునామీ సృష్టించింది. అప్ప‌ట్లో సుమారు రూ.6 కోట్ల బ‌డ్జెట్‌తో తెర‌కెక్కించిన ఈ సినిమా రూ. 50కోట్ల వ‌ర‌కు వ‌సూలు చేయ‌డం ఓ రికార్డుగా నిలిచింది.
అలాంటిది తిరిగి 30 ఏండ్ల త‌ర్వాత ఈ కరణ్ అర్జున్ చిత్రాన్ని నవంబర్ 22న థియేటర్లలో మరోసారి విడుదల చేయబోతున్నట్లు సల్మాన్ ఖాన్ సోమవారం ప్రకటించారు. ఔట్ అండ్ ఔట్ యాక్షన్ డ్రామాగా రూపొందిన ఈ మూవీలో బాలీవుడ్ బిగ్గెస్ట్ సూపర్ స్టార్స్ సల్మాన్ ఖాన్, షారుక్ ఖాన్ సోదరులుగా నటించడం ఓ సెన్షేష‌న్ అయింది. తాజాగా ఈ చిత్రం కొత్త టీజర్‌ను సల్మాన్ ఖాన్ (Salman Khan) షేర్ చేసి కరణ్ అర్జున్ తిరిగి ఈ నవంబర్ 22 దేశవ్యాప్తంగా థియేటర్లలో తిరిగి వస్తున్నార‌ని పేర్కొన్నారు.
ఈ సినిమాలో మ‌మ‌తా కుల‌క‌ర్ణి (Mamta Kulkarni), కాజోల్ (Kajol) హీరోయిన్లుగా న‌టించ‌గా రాఖీ (Raakhee), అమ్రిష్ పురి (Amrish Puri) కీల‌క పాత్ర‌ల్లో న‌టించారు. రాజేశ్ రోషన్ (Rajesh Roshan) సంగీతం అందించిన ఈ సినిమాలోని పాట‌లు అప్ప‌ట్లో బాలీవుడ్‌ను ఓ ఊపు ఊపాయి. ఆదిలాఉండ‌గా ఈ సినిమాకు హృతిక్ రోషన్ (Hrithik Roshan) అసిస్టెంట్ డైరెక్ట‌ర్‌గా ప‌నిచేయ‌డం గ‌మ‌నార్హం. ఇప్పుడు దేశ‌మంతా రీ రిలీజ్ ట్రెండ్ న‌డుస్తుండ‌డంతో ఈ సినిమా ఎలాంటి ఆద‌ర‌ణ‌ను ద‌క్కించుకుంటుందో వేచి చూడాలి.