Waltair Veerayya: ప్రీ రిలీజ్‌ ఈవెంట్‌కు వేదిక ఖరారు

మెగాస్టార్ చిరంజీవి (Chiranjeevi) హీరోగా నటించిన హీరోగా నటించిన సినిమా ‘వాల్తేరు వీరయ్య’(Waltair Veerayya). రవితేజ కీలక పాత్ర పోషించాడు. శ్రుతి హాసన్ హీరోయిన్‌గా నటించింది. మైత్రీ మూవీ మేకర్స్ భారీ బడ్జెట్‌తో రూపొందించింది. ఈ మూవీ ప్రపంచవ్యాప్తంగా జనవరి 13న విడుదల కానుంది. ఈ నేపథ్యంలో మేకర్స్ ప్రమోషన్స్‌ను వేగవంతం చేశారు. అందులో భాగంగా భారీగా ప్రీ రిలీజ్ ఈవెంట్‌ను చేయాలనుకున్నారు. విశాఖ ఆర్కే‌బీచ్ రోడ్డులో కార్యక్రమాన్ని నిర్వహించాలనుకున్నారు. అందుకు పోలీసులను అనుమతి కోరగా వారు నిరాకరించారు. ఆదివారం సాయంత్రం బీచ్‌ రోడ్డుకు సందర్శకులు భారీగా వస్తారన్నారు. ట్రాఫిక్‌, భద్రతా సమస్యలు తలెత్తుతాయన్నారు. ప్రత్నామ్నాయ స్థలం చూసుకోవాలని విశాఖ సీపీ శ్రీకాంత్ సూచించారు. దీంతో చిత్ర బృందం ఏయూ ఇంజినీరింగ్‌ కాలేజీ గ్రౌండ్‌ను పరిశీలించి దరఖాస్తు చేసుకుంది. ఈ వేదికలో ప్రీ రిలీజ్‌ను నిర్వహించుకునేందుకు అనుమతిచ్చినట్లు సీపీ శ్రీకాంత్‌ తెలిపారు.

వీర సింహారెడ్డి ప్రీ రిలీజ్ ఈవెంట్‌కు కూడా పోలీసులు మొదట్లో పర్మిషన్ ఇవ్వలేదు. అనంతరం వేదికను మార్చడంతో అనుమతినిచ్చారు. తాజాగా వాల్తేరు వీరయ్య ఈవెంట్‌కు కూడా అనేక ఇబ్బందులు ఎదురయ్యాయి. ఈ వేడుకలకు అనుమతులు ఇస్తున్నప్పటికీ కట్టుదిట్టమైన షరతులు విధిస్తున్నారని తెలుస్తోంది. ఏపీ ప్రభుత్వం నుంచి ఈ విధంగానే ఇబ్బందులు ఎదురైతే భవిష్యత్తులో వేడుకలు నిర్వహించేందుకు నిర్మాతలు సందేహిస్తారని చెప్పడంలో ఎటువంటి అతిశయోక్తి లేదు.