Game Changer: రామ్ చరణ్ సినిమా సాంగ్ లీక్, ఇద్దరిని అరెస్ట్ చేసిన సైబర్ క్రైమ్ పోలీస్

ఈమధ్య చాలా సినిమాల పాటలు ముందుగానే లీక్ అయిపోయి, సాంఘీక మాధ్యమాల్లో ప్రత్యక్షం అవుతున్నాయి. తాజాగా మహేష్ బాబు (MaheshBabu) సినిమా 'గుంటూరు కారం' #GunturKaaram సినిమా నుండి ఒక పాట లీక్ అవగా, గ్లోబ‌ల్‌ స్టార్ రామ్ చ‌ర‌ణ్ (RamCharan), శంక‌ర్ (Shankar) ద‌ర్శ‌క‌త్వంలో రూపొందుతోన్న భారీ బ‌డ్జెట్ పాన్ ఇండియా చిత్రం ‘గేమ్ చేంజ‌ర్‌’ #GameChanger నుండి కూడా ఒక పాట లీక్ అయింది. ప్రముఖ నిర్మాత దిల్ రాజు (DilRaju) ఈ భారీ బ‌డ్జెట్‌ సినిమాని నిర్మిస్తున్నారు. రాజమౌళి (Rajamouli) దర్శకత్వంలో వచ్చిన 'ఆర్ఆర్ఆర్' #RRR హిట్ తరువాత, రామ్ చ‌ర‌ణ్ చేస్తోన్న సినిమా కావ‌టంతో 'గేమ్ ఛేంజ‌ర్‌'పై భారీ అంచ‌నాలు నెల‌కొన్నాయి.

గేమ్ చేంజర్ సినిమా నుంచి గతంలో ఓ పాట లీక్ అయింది. దీనిపై నిర్మాత దిల్ రాజు ఆగ్రహం వ్యక్తం చేసిన సంగతి తెలిసిందే. ఆ సమయంలో సాంగ్ లీక్‌పై సైబర్ పోలీస్ స్టేషన్‌లో ఫిర్యాదు చేశారు. ఈ లీకులో భాగమైన ఇద్దరిని పోలీసులు అరెస్ట్ చేశారు. భవిష్యత్తులో మళ్లీ ఇలాంటి లీకులు చేయొద్దని హెచ్చరించారు. సైబర్ క్రైమ్ ఏసీపీ శ్రీ చాంద్ భాషా, ఎస్సై శ్రీ భాస్కర్ రెడ్డి, శ్రీ ప్రసేన్ రెడ్డి, శ్రీ సాయి తేజ్ గార్ల బృందం ఈ కేసును చేధించారు. సాంగ్‌ లీక్ చేసిన ఇద్దరు వ్యక్తులను అరెస్ట్ చేశారు. వీరి మీద ఐటీ చట్టంలోని సెక్షన్ 66సీ, 66 ఆర్/డబ్ల్యూ కింద కేసు నమోదు చేశారు.

దీపావ‌ళి సంద‌ర్బంగా ‘గేమ్ ఛేంజ‌ర్’ సినిమా నుంచి తొలి సాంగ్‌ను విడుద‌ల చేస్తున్నారు. రామ్ చ‌ర‌ణ్‌, శంక‌ర్‌ల‌తో పాటు సంగీత దర్శకుడు ఎస్‌.ఎస్‌.త‌మ‌న్ క‌లిసి తొలిసారి పని చేస్తున్న ఈ సినిమా నుంచి పాట‌ను అన్ని భాషల్లో గ్రాండ్ గా విడుదల చేయ‌టానికి స‌న్నాహాలు చేస్తున్నామ‌ని చిత్ర యూనిట్ తెలియ‌జేసింది. ఈ మూవీ నుంచి థమన్ సంగీతం అందించిన 'జరగండి' పాట దీపావళికి విడుదల చేయనున్నట్టు నిర్వాహకులు తెలిపారు.