Tamannaah : ఇప్పటి డాన్స్‌.. ఆయన స్టెప్పుల నుంచి వచ్చిందే!

మిల్కీబ్యూటీ తమన్నా వరుస చిత్రాలతో బిజీగా ఉన్నారు. ఈ నెలలో ఆమె నటించిన రెండు భారీ చిత్రాలు విడుదలకు సిద్ధమయ్యాయి. ఒకటి మెగాస్టార్‌ చిరంజీవి మోస్ట్‌ ఎవైటెడ్‌ మెగా మాస్‌-యాక్షన్‌ ఎంటర్‌టైర్‌ ‘భోళా శంకర్‌’ కాగా తలైవా రజనీకాంత్‌ నటించిన ‘జైలర్‌’ ఒకటి. ఈ రెండు చిత్రాల్లోనూ తమన్నా కథానాయికగా నటించారు. జైలర్‌ ఈ నెల 10న విడుదలవుతుండగా, ‘భోళా శంకర్‌ 11న ప్రేక్షకుల ముందుకొస్తోంది. ఈ సందర్భంగా హీరోయిన్‌ తమన్నా ‘భోళా శంకర్‌’ గురించి ఆసక్తికర విషయాలు చెప్పుకొచ్చారు.

‘‘ఒక రోజు తేడాతో ఇద్దరు స్టార్‌లతో నటించిన సినిమాలు విడుదల కావడం చాలా ఆనందంగా ఉంది. చిరంజీవి, రజనీకాంత్‌ వంటి స్టార్స్‌తో పనిచేయాలనే కోరిక నెరవేరింది. అయితే చిరంజీవిగారితో సైరా చేసినప్పటికీ అందులో మా ఇద్దరికీ డాన్స్‌ నంబర్స్‌ లేవు. ఇందులో ఆయనతో స్టెప్పులేసే అవకాశం రావడం అదృష్టం. ఇందులో ఓ పాట మిల్కీబ్యూటీ అంటూ సాగుతుంది. ఈ జనరేషన్‌ డ్యాన్స్‌లో వాడుతున్న చాలా డాన్స్‌ స్టైల్స్‌ ఆయన దగ్గర నుంచే వచ్చాయని ఆయనతో పని చేశాకే తెలిసింది. కీర్తి సురేష్‌ అత్యుత్తమ నటి. తను ఇంటెన్స్‌ సీన్స్‌తో పాటు అన్నీ ఎమోషన్స్‌ని సెటిల్డ్‌ అండ్‌ బ్యాలెన్సింగా చేస్తుంది. తనతో వర్క్‌ చాలా బావుంది. ఇద్దరం మంచి ఫ్రెండ్స్‌ అయ్యాం.

ఇది ‘వేదాళం’కు రీమేక్‌ అయినా మెహర్‌ చాలా మార్పులు చేశారు. ఇందులో నా పాత్ర కొత్తగా ఉంటుంది. ఒరిజినల్‌లో నా పాత్ర ఉండదు. ఇందులో చాలా డిఫరెంట్‌గా నా క్యారెక్టరైజేషన్‌ ఉంటుంది. హ్యుమర్‌ వుంటుంది. నాకు కెరీర్‌కు ప్రత్యేకమైన చిత్రంగా నిలుస్తుంది. సినిమాలో పాటలన్నీ అద్భుతంగా కుదిరాయి. మిల్కీ బ్యూటీ, జామ్‌ జామ్‌ పాటలు నాకు బాగా నచ్చాయి. ‘జామ్‌ జామ్‌ పాటలో నర్సపల్లి అనే ట్విస్ట్‌ పెట్టడం పార్టీ సాంగ్‌కి మరింత హుషారు తీసుకొచ్చింది. ‘కాళిదాసు’ తర్వాత మరోసారి సుశాంత్‌తో వర్క్‌ చేశా. ఇక జైలర్‌ విషయానికొస్తే చిన్న పాత్రే కానీ కీలకమైనది. ‘కావాలయ్యా’ పాటకు ఎంత క్రేజ్‌ వచ్చిందో తెలిసిందే!

నేను రామ్‌చరణ్‌, చిరంజీవి ఇద్దరితో పనిచేశా. అద్భుతమైన వ్యక్తులు ఇద్దరు. చాలా సపోర్టివ్‌గా వుంటారు. చరణ్‌ నా కెరీర్‌ బిగినింగ్‌ నుంచి చాలా సపోర్టివ్‌గా ఉన్నారు. చిరంజీవిగారితో పని చేయడం మంచి అనుభవం. ప్రస్తుతం తమిళంలో ‘అరణం’, మలయాళంలో ‘బాంద్ర’ సినిమా విడుదలకు సిద్థమౌతుంది. హాట్‌స్టార్‌ కోసం ఓ వెబ్‌ సిరీస్‌ చేస్తున్నా.