ఆస్కార్‌ పార్టీ.. ఫొటోలు వైరల్‌!

ఆస్కార్‌(oscar) వేడుకకు సమయం ఆసన్నమైంది. ఈ నెల 12న లాస్‌ ఏంజెల్స్‌లోని డాల్బీ థియేటర్‌ వేదికగా జరగనున్న వేడుకలో ఈసారి తెలుగు చిత్రం ‘ఆర్‌ఆర్‌ఆర్‌’ (rrr) టీమ్‌ సందడి చేయనుంది. బెస్ట్‌ ఒరిజినల్‌ సాంగ్‌ కేటగిరీలో ‘ఆర్‌ఆర్‌ఆర్‌’లోని నాటునాటు పాట నామినేషన్‌ దక్కించుకున్న సంగతి తెలిసిందే. దీంతో ‘ఆర్‌ఆర్‌ఆర్‌’ హంగామా మామూలుగా లేదు. సినిమా టీమ్‌లో కీలకమైన వారంతా అమెరికాలో సందడి చేస్తున్నారు. ఆస్కార్‌ వేదికపై కీరవాణి సంగీత సారథ్యంలో ఆ పాటను సింగర్స్‌ కాలభైరవ, రాహుల్‌ సిప్లిగంజ్‌ లైవ్‌ పెర్‌పార్మెన్స్‌ చేయనున్నారు. ఈ నేపథ్యంలో అమెరికాలో ఉన్న ‘ఆర్‌ఆర్‌ఆర్‌’ టీమ్‌కు నటి ప్రియాంక చోప్రా ప్రత్యేకంగా పార్టీ ఇచ్చారు. సౌత్‌ ఏషియన్‌ ఎక్స్‌లెన్స్‌ పేరుతో జరిగిన ఈ వేడుకల్లో ఉపాసన పాల్గొన్నారు. తన భర్త రామ్‌చరణ్‌, ప్రియాంకలతో ఫొటోలు దిగి ఇన్‌స్టా వేదికగా పోస్ట్‌ చేశారు. ‘లాస్‌ ఏంజెల్స్‌ ఫ్యామిలీ.. ఎల్లప్పుడూ మాకోసం ఉన్నందుకు థ్యాంక్యూ ప్రియాంక’ అని పేర్కొన్నారు. ఈ పార్టీలో ఎన్టీఆర్‌ స్టైలిష్‌ లుక్‌లో మెరిశారు. ఆయనతో ఫొటోలు దిగేందుకు ప్రీతిజింటా, జాక్వెలిన్‌ ఫెర్నాండేజ్‌ తదితరులు ఆసక్తి కనబరిచారు. ప్రస్తుతం ఆ ఫొటోలు నెట్టింట వైరల్‌ అవుతున్నాయి. మరోవైపు, ‘నాటు నాటు’ సింగర్‌ రాహుల్‌ సిప్లిగంజ్‌ సైతం ఈ పార్టీలో పాల్గొని ప్రియాంక చోప్రా, తారక్‌లతో ఫొటో దిగి సోషల్‌ మీడియాలో షేర్‌ చేసి ‘చాలా ఆనందంగా ఉంది. ప్రియాంక చోప్రాజీ అంటూ పోస్ట్‌ చేశాడు.