Prasanth Varma: ‘లవ్ రెడ్డి’ గ్లిమ్స్ చూస్తుంటే నాకు కూడా అలా అనిపిస్తుంది

గీతాన్స్ ప్రొడక్షన్స్, సెహెరి స్టూడియో, ఎమ్జీఆర్ ఫిలిమ్స్ బ్యానర్స్ సంయుక్తంగా నిర్మిస్తున్న చిత్రం ‘లవ్ రెడ్డి’ (Love Reddy). అంజన్ రామచంద్ర (Anjan Ramachandra), శ్రావణి రెడ్డి (Sravani Reddy) హీరోహీరోయిన్లుగా నటిస్తున్న ఈ చిత్రం ప్రస్తుతం షూటింగ్ పూర్తి చేసుకుని విడుదలకు సిద్ధమవుతోంది. ఆంధ్ర, కర్ణాటక సరిహద్దు ప్రాంతంలో జరిగే స్వచ్ఛమైన ప్రేమకథగా ఈ చిత్రాన్ని స్మరన్ రెడ్డి (Smaran Reddy) తెరకెక్కిస్తున్నారు. ఈ చిత్రంతో ఆయన దర్శకుడిగా పరిచయం అవుతుండగా.. హేమలత రెడ్డి, మదన్ గోపాల్ రెడ్డి, ప్రభంజనం రెడ్డి, నాగరాజు బీరప్ప సంయుక్తంగా నిర్మిస్తున్నారు. తాజాగా ఈ చిత్ర గ్లిమ్స్‌ను యంగ్ దర్శకుడు ప్రశాంత్ వర్మ విడుదల చేశారు.

ఈ సందర్భంగా దర్శకుడు ప్రశాంత్ వర్మ (Prasanth Varma) మాట్లాడుతూ.. ‘లవ్ రెడ్డి’ గ్లిమ్స్ చాలా ఫ్రెష్‌గా ఉంది. ఇది చూస్తుంటే నాకు కూడా ఒక లవ్ స్టోరీ చేయాలని అనిపిస్తుంది. అందరూ యంగ్ టీమ్ కలిసి చేసున్న ఈ సినిమా పెద్ద విజయం సాధించాలని కోరుతున్నాను. యూనిట్ మొత్తానికి ఆల్ ద బెస్ట్.. అని అన్నారు. డైరెక్టర్ స్మరన్ మాట్లాడుతూ... ఆంధ్ర, కర్ణాటక బోర్డర్‌లో జరిగే ఒక స్వచ్ఛమైన ప్రేమకథ ఇది. అన్ని సెక్షన్ ఆఫ్ ఆడియన్స్‌కు కనెక్ట్ అయ్యే విధంగా సినిమా ఉంటుంది. త్వరలో టీజర్, ఆ తర్వాత ట్రైలర్ విడుదల చేయనున్నాం. మా సినిమాకు సపోర్ట్ చేసున్న నిర్మాతలకు, ఇతర టెక్నీషియన్స్‌కు.. ముఖ్యంగా హీరో అంజన్ రామచంద్ర‌కు కృతజ్ఞతలు అని పేర్కొన్నారు. హీరో అంజన్ రామచంద్ర మాట్లాడుతూ.. గ్లిమ్స్‌ను విడుదల చేసిన ప్రశాంత్ వర్మకు ధన్యవాదాలు తెలిపారు. సినిమా చాలా బాగా వచ్చిందని.. దర్శకుడు స్మరన్ కథను నడిపిన విధానం అందరికీ నచ్చుతుందని.. ఒక మంచి సినిమాతో ప్రేక్షకుల ముందుకు రాబోతున్నందుకు సంతోషంగా ఉందని వెల్లడించారు.