Prabhas: రామ్‌చరణ్‌తో సినిమా చేస్తా!

‘‘రామ్‌చరణ్‌ (Ram charan) నాకు మంచి స్నేహితుడు. ఏదో ఒక రోజు మేమిద్దరం కలిసి కచ్చితంగా సినిమా చేస్తాం’’ అని పాన్‌ ఇండియా స్టార్‌ ప్రభాస్‌ (Prabhas) అన్నారు. తాజాగా ఆయన కథానాయికుడిగా నటిస్తున్న చిత్రానికి ‘కల్కి 2898 ఏడీ’ (Kalki 2898 ad) టైటిల్‌ ఖరారు చేశారు. ప్రాజెక్ట్‌ కె వర్కింగ్‌ టైటిల్‌తో చిత్రీకరణ చేస్తున్న ఈ సినిమా టైటిల్‌ గ్లింప్స్‌ను ప్రతిష్ఠాత్మకమైన ‘శాన్‌ డియాగో కామిక్‌ కాన్‌’ (San Diago) ఈవెంట్లో విడుదల చేశారు. ఈ సందర్భంగా అక్కడ మీడియాతో చిత్ర బృందం మాట్లాడారు. దీనికి సంబంధించిన వీడియో సోషల్‌మీడియాలో వైరలవుతోంది. హీరో ప్రభాస్‌ రామ్‌చరణ్‌తో కలిసి సినిమా చేస్తానని స్టేట్‌మెంట్‌ ఇవ్వడంతో ‘అది బిగ్‌ మల్టీస్టారర్‌ అవుతుందంటూ’ కామెంట్స్‌ పెడుతున్నారు అభిమానులు. అలాగే రాజమౌళి గురించి మాట్లాడుతూ ‘‘భారత్‌లో ఉన్న అద్భుతమైన దర్శకుల్లో రాజమౌళి ఒకరు. ‘ఆర్‌ఆర్‌ఆర్‌’ చాలా గొప్ప సినిమా. ఆ సినిమాలోని పాటకు ఆస్కార్‌ రావడం ఎంతో ఆనందాన్నిచ్చింది. భారతీయులందరికీ దక్కిన గౌరవం అది. ఇలాంటి వాటికి రాజమౌళి అర్హుడు’’ అని అన్నారు.

‘కల్కి 2898 ఏడీ’ చిత్రం గురించి ప్రభాస్‌ మాట్లాడారు. ఇందులో బ్లూ స్ర్కీన్‌ సన్నివేశాలు ఎక్కువగా ఉంటాయి కదా.. మీకు వాటిని చూసి బోర్‌ కొట్టడంలేదా?’ అనే ప్రశ్నకు ‘మొదట్లో చాలా బోర్‌ కొట్టింది. అంత పెద్ద బ్లూ స్ర్కీన్‌ ముందు నేను చాలా చిన్నగా కనిపించేవాడిని. కానీ, గ్లింప్స్‌ చూశాక ఆనందం వేసింది. బాగుందనిపించింది’ అని చెప్పారు. సైన్స్‌ ఫిక్షన్‌ నేపథ్యంలో రూపొందుతోన్న ఈ చిత్రంపై భారీ అంచనాలు నెలకొన్నాయి. ఇందులో బాలీవుడ్‌ అగ్ర నటుడు అమితాబ్‌ బచ్చన్‌, కోలీవుడ్‌ అగ్ర నటుడు కమల్‌హాసన్‌ కీలక పాత్రల్లో కనిపించనున్నారు. దీంతో సినివుమాకు మరింత హైప్‌ వచ్చింది. నాగ్‌ అశ్విన్‌ దర్శకత్వంలో ప్రభాస్‌కు జోడీగా దీపికా పదుకొణె నటిస్తోంది. వచ్చే సంక్రాంతికి ఈ చిత్రాన్ని ప్రపంచవ్యాప్తంగా విడుదల చేయనున్నారు.