Kannappa : శివుడిగా ప్రభాస్‌.. నిజమేనా.. విష్ణు ఏమన్నారంటే..

‘కన్నప్ప’(Kannappa) చిత్రం మంచు విష్ణు డ్రీమ్‌ ప్రాజెక్ట్‌. ఎంతోకాలంగా ఈ చిత్రాన్ని తెరకెక్కించాలని ప్రయత్నాలు చేస్తున్నారు. ఇటీవల ఈ చిత్రాన్ని శ్రీకాళహస్తి దేవాలయంలో పూజా కార్యక్రమాలతో ప్రారంభించారు. ముఖేష్‌ కుమార్‌ సింగ్‌ (mukesh kumar singh) దర్శకత్వం వహించనున్నారు. ఇప్పుడీ సినిమాకు సంబంధించి ఓ వార్త నెట్టింట హల్‌చల్‌ చేస్తోంది. పాన్‌ ఇండియా స్టార్‌ ప్రభాస్‌ (Prabhas) ఈ చిత్రంలో అతిథి పాత్ర పోషించనున్నారని టాక్‌ నడుస్తోంది. ఆ పాత్ర సినిమాకు చాలా కీలకంగా ఉండబోతోందని కూడా వార్తలొస్తున్నాయి. ఈ విషయంపై తాజాగా మంచు విష్ణు స్పందించారు. ‘హర హర మహాదేవ్‌’ అని ట్వీట్‌ చేశారు.

దీనిని చూసిన అభిమానులు.. ‘కన్నప్ప’ చిత్రంలో ప్రభాస్‌ ఈశ్వరుడిగా కనిపించనున్నారని భావిస్తున్నారు. ప్రస్తుతం నెట్టింట ఈ వార్త వైరల్‌ అవుతోంది. ఈ చిత్రంలో నుపుర్‌ సనన్‌ కథానాయిక. ‘‘మహాకవి దూర్జటి రాసిన శ్రీకాళహస్తీశ్వర మహత్యంలోని భక్తకన్నప్ప చరిత్రను ఆదర్శంగా తీసుకుని ఈ చలన చిత్రాన్ని తెరకెక్కిస్తున్నాం. కన్నప్ప వృత్తాంతం 2వ శతాబ్దంలో జరిగిందని, ప్రస్తుతం అక్కడి పరిసరాల్లో సినిమా తీయడం వీలు కాదు. అందుకోసం ఈ చిత్ర నిర్మాణానికి ఆర్నెలపాటు న్యూజిల్యాండ్‌కు వెళ్తున్నాం. కన్నప్ప భక్తిని, ఆయన గొప్పతనాన్నీ నేటి తరానికి తెలియజేయాలనే సంకల్పంతో పాన్‌ ఇండియా స్థాయిలో ఈ చిత్రాన్ని రూపొందిస్తున్నాం. పరుచూరి గోపాలకృష్ణ, బుర్ర సాయిమాధవ్‌, తోట ప్రసాద్‌ కథకి కీలకమైన మెరుగులు దిద్దారు. ఒకే షెడ్యూల్‌లో చిత్రీకరణ పూర్తి చేస్తాం’’ అని సినిమా ప్రారంభం రోజు మంచు విష్ణు చెప్పారు. మణిశర్మ, స్టీఫెన్‌ దేవాసి సంగీతం అందించనున్నారు.