Nani30: అభిమానులకు న్యూ ఇయర్ ట్రీట్.. కొత్త సినిమాను ప్రకటించిన నేచురల్ స్టార్..

సినీ ఇండస్ట్రీలో గాడ్ ఫాదర్ అనేది లేకుండా అంచెలంచెలుగా ఎదిగిన వ్యక్తి నేచురల్ స్టార్ నాని (Nani). ‘భలే భలే మగాడివోయ్’, ‘నేను లోకల్’, ‘ఎమ్‌సీఏ’ వంటి విభిన్న కథా చిత్రాలతో ప్రేక్షకులను అలరించాడు. ఫ్యామిలీ ఆడియన్స్‌తో పాటు మాస్‌లోనూ మంచి పాలోయింగ్‌ను సంపాదించుకున్నాడు. నాని ప్రస్తుతం ‘దసరా’ (Dasara) లో నటిస్తున్నాడు. మునుపెన్నడూ చూడని మాస్ క్యారెక్టర్‌లో కనిపించనున్నాడు. ఈ మూవీ ప్రపంచవ్యాప్తంగా ఏప్రిల్‌లో విడుదల కానుంది. ఈ నేపథ్యంలో నాని కొత్త సినిమాని ప్రకటించాడు.

కొత్త ప్రాజెక్టును ప్రకటిస్తూ మేకర్స్ ఓ వీడియోను విడుదల చేశారు. అది హృద్యంగా కొనసాగింది. కుటుంబ అనుబంధాలకు పెద్ద పీట వేయనున్నట్టు వీడియోను చూస్తే అర్థమవుతుంది. ఈ ప్రాజెక్టును ‘నాని30’ (Nani30) అని వర్కింగ్ టైటిల్‌గా వ్యవహరిస్తున్నారు. డెబ్యుటెంట్ శౌర్య (Shourya) తెరకెక్కించనున్నాడు. ‘సీతారామం’ బ్యూటీ మృణాల్ ఠాకూర్ (Mrunal Thakur) హీరోయిన్‌గా నటించనుంది. కొత్త బ్యానర్ వైర ఎంటర్‌టైన్‌మెంట్స్ (Vyra Entertainments) పతాకంపై మోహన్ చెరుకూరి నిర్మించనున్నాడు. హెషం అబ్దుల్ వహాబ్ (Hesham Abdul Wahab) సంగీతం అందించనున్నాడు. నాని ప్రస్తుతం నటిస్తున్న ‘దసరా’ పూర్తి కాగానే కొత్త ప్రాజెక్టు పట్టాలెక్కే అవకాశం ఉంది.