Nani: థియేటర్‌లో దసరా.. క్యూలో మరో విడుదల!

నేచురల్‌ స్టార్‌ నాని (nani)ప్రస్తుతం ‘దసరా’ సినిమా విజయాన్ని ఆస్వాదిస్తున్నారు. సినిమాకు ముందు ఏదైతే నమ్మకాన్ని వ్యక్తం చేశారో అదే నిజమైనందుకు ఆయన చాలా ఉత్సాహంగా సక్సెస్‌ను సెలబ్రేట్‌ చేసుకుంటున్నారు. ఒకపక్క దసరా థియేటర్లలో సందడి చేస్తుండగానే.. మరోవైపు కొత్త చిత్రం విడుదల తేదీని ఖరారు చేశారు నాని. ఆయన హీరోగా నటిస్తున్న 30వ (Nani30) చిత్రం డిసెంబరు 21న విడుదల చేయనున్నట్లు నిర్మాణ సంస్థ అధికారికంగా ప్రకటించింది. ఈ చిత్రంతో శౌర్య అనే కొత్త దర్శకుడు పరిశ్రమకు పరిచయమవుతున్నారు. వైరా ఎంటర్‌టైన్‌మెంట్స్‌ పతాకంపై మోహన్‌ చెరుకూరి (mohan cherukuri)ఈ చిత్రాన్ని నిర్మిస్తున్నారు. ఈ చిత్రంలో నాని ఓ చిన్నారికి తండ్రి నటిస్తున్నారు. తండ్రీ కూతుళ్ల బంధం ప్రధానంగా ఈ చిత్రం సాగనుందని తెలుస్తోంది. నాని సరసన ‘సీతారామం’ ఫేమ్‌ మృణాల్‌ ఠాకూర్‌(Mrunal thakur) కథానాయికగా నటిస్తున్నారు. ప్రస్తుతం గోవాలో చిత్రీకరణ జరుగుతోంది.

నాని, కీర్తి సురేశ్‌ జంటగా ఓదెల శ్రీకాంత్‌ దర్శకత్వం వహించిన ‘దసరా’ చిత్రం ఇటీవల ప్రేక్షకుల ముందుకొచ్చి సక్సెస్‌ఫుల్‌ ఆడుతోంది. నాని సినిమాల్లో బ్లాక్‌బస్టర్‌ హిట్‌గా నిలిచింది. ‘దసరా’ చిత్రం నానిని 100 కోట్ల క్లబ్‌లో చేర్చింది.