Lavanya Tripati : కొత్త నిర్ణయం... మరింత వేగంగా!

కొన్ని చిత్రాల్లో హీరోయిన్లకు ఉన్న స్కోప్‌ ఏంటో ప్రత్యేకంగా చెప్పక్కర్లేదు. కమర్షియల్‌ సినిమాల్లో హీరోయిన్లు గ్లామర్‌ సన్నివేశాలకు, పాటలకు, రొమాంటిక్‌ సన్నివేశాలకు మాత్రమే పరిమితమవుతుంటారు. పది మందిలో ఇద్దరికి నటనకు ఆస్కారమున్న పాత్రలు దక్కుతున్నాయి అనడంలో ఎలాంటి సందేహం లేదు. అయితే ఇప్పుడు ఆ విధానం మారింది. ఓటీటీలకు ఆదరణ పెరగడంతో హీరోయిన్లకు తమని తాము నిరూపించుకునే అవకాశం దొరుకుతుంది. ఓటీటీలో వచ్చే సినిమాలు, సిరీస్‌ల్లో విభిన్న పాత్రలు పోషించి అలరిస్తున్నారు. తాజాగా వెబ్‌ సిరీస్‌లకు సై అంటున్నారు కాబోయే మెగా కోడలు లావణ్యా త్రిపాఠీ(Lavanya Tripati). ఇప్పటికే ఆమె ఓ సిరీస్‌ చేశారు. ఇప్పుడు డిస్నీ ప్లస్‌ హాట్‌స్టార్‌ కోసం ఓ సిరీస్‌ చేయబోతున్నారు.

లావణ్యా త్రిపాఠి కీలక పాత్రలో అన్నపూర్ణ స్టూడియోస్‌ సంస్థ ఓ వెబ్‌ సిరీస్‌ (Web series) ప్లాన్‌ చేసిందని తెలిసింది. ఇంకా టైటిల్‌ ఖరారు చేయని ఈ సిరీస్‌ డిస్నీ ప్లస్‌ హాట్‌ స్టార్‌ ఓటీటీ కోసం ఎక్స్‌క్లూజివ్‌గా రూపొందించనున్నారు. ఇందులో లావణ్యాకు జోడీగా ‘బిగ్‌ బాస్‌’ ఫేమ్‌ అభిజీత్‌ నటిస్తున్నారు. విశ్వక్‌ ఖండేరావు దర్శకుడు. ఇంతకు ముందు ‘స్కైలాబ్‌’ సినిమాకు దర్శకత్వం వహించారు. ప్రస్తుతం ఈ సిరీస్‌ చిత్రీకరణ శరవేగంగా జరుగుతోంది. రొమాంటిక్‌ కామెడీగా తెరకెక్కుతున్న ఈ సిరీస్‌ ఇప్పటి వరకు వచ్చిన సిరీస్‌లకు భిన్నంగా ఉంటుందని తెలుస్తోంది. ఈ సిరీస్‌ గురించి ఇంకా అధికారిక ప్రకటన రాలేదు. త్వరలో వెల్లడించే అవకాశం ఉంది. లావణ్యా ఇప్పుడు మెగా ఫ్యామిలీతకి కోడలిగా వెళ్లబోతోంది. వరుణ్‌తేజ్‌తో ఏడు అడుగులు వేయనుంది. అందుకే సెట్స్‌ మీదున్న ప్రాజెక్ట్స్‌ వీలైనంత త్వరగా పూర్తి చేయాలని శరవేగంగా చిత్రీకరణ చేస్తున్నారు. వీరిద్దరిది డెస్టినేషన్‌ వెడ్డింగ్‌ అని ప్రచారం జరుగుతోంది.