Golden Globe Awards: హాలీవుడ్ రిపోర్టర్‌కి గిఫ్ట్ ఇచ్చిన ఎన్టీఆర్.. అందులో ఏం ఉందో తెలుసా?

‘ఆర్ఆర్ఆర్’ (RRR) మూవీలోని ‘నాటు నాటు’ (Naatu Naatu) సాంగ్‌కి గోల్డెన్ గ్లోబ్ అవార్డు (Golden Globe Award) వచ్చిన విషయం తెలిసిందే. దీంతో దేశవ్యాప్తంగా ఎంతోమంది ఈ మూవీపై ప్రశంసలు కురిపిస్తున్నారు. ఈ అవార్డు రావడంపై ఎన్టీఆర్ హాలీవుడ్ రిపోర్టర్‌, వెరైటీ కల్చరల్ అండ్ ఈవెంట్ ఎడిటర్ మార్క్‌తో మాట్లాడుతూ.. సంతోషం వ్యక్తం చేశాడు. అంతేకాకుండా.. ఆ రిపోర్టర్‌కి ఓ సర్‌ప్రైజ్ గిఫ్ట్ కూడా ఇచ్చాడు.

ఎన్టీఆర్ మాట్లాడుతూ.. ‘మా దర్శకుడు ఎస్ఎస్ రాజమౌళి ట్రాక్ రికార్డుని బట్టి ఈ సినిమా విజయం సాధిస్తుందని మాకు తెలుసు. కానీ ఇది అంతకుమించి. జపాన్, అమెరికా ఇంత సక్సెస్ వస్తుందని ఊహించలేదు’ అని చెప్పుకొచ్చాడు. అలాగే మార్వెల్ మూవీస్ చేయాలని ఉందని కూడా ఎన్టీఆర్ తెలిపాడు. మార్క్ పుట్టినరోజు కావడంతో ఆయనకి ఎన్టీఆర్ ఓ గిఫ్ట్ ఇచ్చాడు. అది చూసి మార్క్ చాలా సంతోషం వ్యక్తం చేశాడు. దీనికి సంబంధించిన వీడియో ప్రస్తుతం నెట్టింట వైరల్ అవుతోంది.

అలాగే మార్క్ ఆ గిఫ్ట్ ప్యాక్‌ని ఓపెన్ చేశాడు. దానికి సంబంధించిన వీడియో కూడా వైరల్ అవుతోంది. ఆ ప్యాక్‌లో ఓ టై ఉంది. అది చూసిన మార్క్ చాలా సంతోషించాడు. ఎన్టీఆర్‌కి ధన్యవాదాలు తెలిపాడు.