Bala Krishna: రామ్‌ సినిమాకు కళామతల్లి ఇచ్చిన వరం!

‘ఈ రోజుల్లో సినిమా అంటే ఎలా ఉండాలి.. ప్రేక్షకుల్ని ఎలా థియేటర్లకు రప్పించాలి అన్న (Ram potineni) విషయంపై దర్శక నిర్మాతలు దృష్టి పెట్టాలి. రామ్‌ తెలంగాణ నేపథ్యంలో ‘ఇస్మార్ట్‌ శంకర్‌’ చేసి నాకొక సవాల్‌ విసిరాడు. ఇప్పుడు నేను అదే నేపథ్యంలో ‘భగవంత్‌ కేసరి’ చేశాను. ‘దేవదాస్‌’ నుంచి రామ్‌ ప్రయాణాన్ని చూస్తున్నా. విభిన్న నేపథ్యమున్న కథలు, పాత్రలు ఎంచుకుంటూ ముందుకెళ్తున్నాడు. తెలుగు కళామతల్లి ఇచ్చిన వరం రామ్‌’’ నందమూరి బాలకృష్ణ (Balakrishna) అన్నారు. శనివారం రాత్రి హైదరాబాద్‌లో జరిగిన ‘స్కంద’ (Skanda) సినిమా థండర్‌ వేడుకలో ముఖ్య అతిథిగా పాల్గొన్నారు. రామ్‌ పోతినేని కథానాయకుడిగా బోయపాటి శ్రీను తెరకెక్కించిన పాన్‌ ఇండియా చిత్రమిది. శ్రీనివాస చిట్టూరి నిర్మాత. శ్రీలీల కథానాయిక. సయీ మంజ్రేకర్‌, శ్రీకాంత్‌ తదితరు?ని కీలక పాత్రలు పోషించారు. సెప్టెంబరు 15న ప్రేక్షకుల ముందుకు రానుందీ సినిమా. ఈ సందర్భంగా ప్రీ రిలీజ్‌ థండర్‌ వేడుకలో చిత్ర ట్రైలర్‌ విడుదల చేశారు. అలాగే ‘చంద్రయాన్‌ 3’ విజయంపై ఓ ప్రత్యేక గ్లింప్స్‌ విడుదల చేసి ఇస్రో టీమ్‌కు అభినందనలు తెలిపారు.

బాలకృష్ణ మాట్లాడుతూ ‘‘రామ్‌ తెలంగాణ నేపథ్యంలో ‘ఇస్మార్ట్‌ శంకర్‌’ చేసి నాకొక సవాల్‌ విసిరాడు. ఇప్పుడు నేను అదే నేపథ్యంలో ‘భగవంత్‌ కేసరి’ చేశాను. నేనింకా పాస్‌ అవ్వాల్సి ఉంది. నేను.. బోయపాటి కలిసి ‘సింహా’, ‘లెజెండ్‌’, ‘అఖండ’ లాంటి విజయవంతమైన చిత్రాలు చేశాం. ఇప్పుడు రామ్‌ - బోయపాటి కలయికలో వస్తున్న ‘స్కంద’ పెద్ద విజయాన్ని సాధించాలని కోరుకుంటున్నా. ‘దేవదాస్‌’ నుంచి రామ్‌ ప్రయాణాన్ని చూస్తున్నా. బిన్నమైన పాత్రలు చేస్తూ ముందుకెళ్తున్నాడు. తెలుగు కళామతల్లి ఇచ్చిన వరం రామ్‌. అందం.. అభినయం.. డాన్స్‌ అన్ని కలగలిసిన మంచి నటి శ్రీలీల. కచ్చితంగా ఈ సినిమా ప్రేక్షకులకు కనులవిందు చేస్తుందని నమ్ముతున్నా. కొత్తదనాన్ని.. వైవిధ్యతను ఆస్వాదించే అభిరుచి.. అభిలాష తెలుగు ప్రేక్షకుల సొంతం. ఈ రోజున మన సినిమాలకు దేశ విదేశాల్లోనూ బ్రహ్మరథం పడుతున్నారంటే కారణం ప్రేక్షకుల్లే’’ అని అన్నారు.

హీరో రామ్‌ మాట్లాడుతూ ‘‘బోయపాటి ఏదైనా మొండిగా నమ్మేసి ముందుకెళ్లిపోతారు. ట్రైలర్‌లో కనిపించిన నా మాస్‌ లుక్‌ను ఆయన ఏడు గంటలు దగ్గరుండి రెడీ చేయించుకున్నారు. 5ఏళ్ల క్రితం ఈ ప్రాజెక్ట్‌ నా దగ్గరకు తీసుకొచ్చారు. తమన్‌ అద్భుతమైన నేపథ్య సంగీతం అందించారు. నిర్మాతలు శ్రీనివాస చిట్టూరి, పవన్‌ కుమార్‌ లేకపోతే ఈ సినిమా లేదు’’ అన్నారు.

దర్శకుడు బోయపాటి శ్రీను మాట్లాడుతూ ‘‘నేను 15ఏళ్లుగా బాలకృష్ణతో ప్రయాణిస్తున్నా. ఆయనొక వ్యక్తి కాదు.. శక్తి. ఏ పాత్రైనా.. పదమైనా ఆయనకు కచ్చితంగా లొంగుతుంది. ‘స్కంద’ విషయానికొస్తే ఇది చాలా మంచి సినిమా. గుండె మీద చెయ్యి వేసుకొని ఈ చిత్రం చూడండి. యాక్షన్‌, ఎమోషన్స్‌ అన్నీ పుష్కలంగా ఉన్న పరిపూర్ణమైన సినిమా. రామ్‌ అంటే ఎనర్జీనో.. ఇంకేదో కాదు. రామ్‌ అంటే ఓ తపన. తను ఈ స్థాయిలో ఉన్నాడంటే తనలో ఉన్న తపనే కారణం. ఓ మంచి సినిమా తీసి ఇస్తే దాన్ని తమన్‌ ఇంకెంత అద్భుతంగా తీర్చిదిద్దుతాడో ఈ చిత్రంతో మరోసారి నిరూపితం కానుంది. ఈ సినిమాలో స్టంట్‌ శివ యాక్షన్‌ ఎలా ఉండనుందో రేపు తెరపై చూసి తెలుసుకోవాలి. ‘అఖండ 2’ కచ్చితంగా చేస్తాను. దాని వివరాలు నేనే వెల్లడిస్తా’’ కచ్చితంగా హ్యాట్రిక్‌ కొడతాం’’ అని అన్నారు. ఈ కార్యక్రమంలో శ్రీనివాస చిట్టూరి, శ్రీకాంత్‌, సయీ మంజ్రేకర్‌, అజయ్‌, ఇంద్రజ, తమన్‌, శివమణి తదితరులు పాల్గొన్నారు.