Ala Ninnu Cheri: ‘అలా నిన్ను చేరి’.. మంచి సినిమా చూశామనే ఫీలింగ్తో బయటకు వస్తారు
ABN , First Publish Date - 2023-11-09T21:34:48+05:30 IST
దినేష్ తేజ్, హెబ్బా పటేల్, పాయల్ రాధాకృష్ణలు హీరో హీరోయిన్లుగా రాబోతున్న ఫీల్ గుడ్ మూవీ ‘అలా నిన్ను చేరి’. ఈ చిత్రం నవంబర్ 10న ప్రేక్షకుల ముందుకు రాబోతోంది. ఈ క్రమంలో హీరో దినేష్ తేజ్ మీడియాతో ముచ్చటించారు.
![Ala Ninnu Cheri: ‘అలా నిన్ను చేరి’.. మంచి సినిమా చూశామనే ఫీలింగ్తో బయటకు వస్తారు](https://media.chitrajyothy.com/media/2023/20231102/Ala_Ninnu_Cheri_Movie_379a6f5d7a.jpg)
దినేష్ తేజ్, హెబ్బా పటేల్, పాయల్ రాధాకృష్ణలు హీరో హీరోయిన్లుగా రాబోతున్న ఫీల్ గుడ్ మూవీ ‘అలా నిన్ను చేరి’. ఈ మూవీని విజన్ మూవీ మేకర్స్ బ్యానర్పై కొమ్మాలపాటి శ్రీధర్ సమర్పిస్తున్నారు. అన్ని రకాల అంశాలను జోడించి ఈ మూవీని మారేష్ శివన్ తెరకెక్కించగా కొమ్మాలపాటి సాయి సుధాకర్ నిర్మించారు. ఆస్కార్ గ్రహీత చంద్రబోస్ పాటలు రాయగా.. సుభాష్ ఆనంద్ సంగీతాన్ని అందించారు. చిత్రం నవంబర్ 10న ప్రేక్షకుల ముందుకు రాబోతోంది. ఈ క్రమంలో హీరో దినేష్ తేజ్ మీడియాతో ముచ్చటించారు.
అలా నిన్ను చేరి చిత్రం ప్రేక్షకుల ముందుకు రాబోతోంది? ఎలాంటి ఫీలింగ్ ఉంది?
అలా నిన్ను చేరి అంటూ కొత్తగా ప్రయత్నించాను. కమర్షియల్ రోల్ను పోషించాను. అందరికీ నచ్చుతుందని భావిస్తున్నాను. ప్రతీ ఒక్క మిడిల్ క్లాస్ అబ్బాయికి ఎదురయ్యే సంఘర్షణే ఇందులో ఉంటుంది. ప్రేమ ముఖ్యమా? లక్ష్యం ముఖ్యమా? అన్నది చూపిస్తాం. ఆ పాయింటే నాకు ఈ సినిమా చేయడానికి స్పూర్తిని ఇచ్చింది.
‘ప్లే బ్యాక్’ తరువాత చాలా గ్యాప్తో వస్తున్నట్టున్నారు? ఎలా అనిపిస్తోంది?
కరోనా టైంలో వచ్చిన ప్లే బ్యాక్ వల్ల మంచి పేరు వచ్చింది. మంచి రివ్యూలు వచ్చాయి. నాకు మంచి ప్రశంసలు దక్కాయి. ఆ తరువాత ఓ చిత్రం థియేటర్లోకి వచ్చింది కానీ అంతగా మెప్పించలేక పోయింది. ఇప్పుడు ఈ చిత్రంతో ఎలాంటి ప్రశంసలు వస్తాయో చూడాలి.
ఇండస్ట్రీలో బ్యాక్ గ్రౌండ్ లేకుండా ఎదగడం కష్టం కదా? మీరు ఎలాంటి కష్టాలను ఎదుర్కొన్నారు?
ఇండస్ట్రీలో అందరికీ కష్టాలుంటాయి. కానీ మన వద్దకు వచ్చే స్క్రిప్ట్లను జాగ్రత్తగా ఎంచుకోవాలి. జనాలకు నచ్చే కథల్లో కనిపించాలి.
ఈ పాత్రతో మీ రియల్ లైఫ్కు సంబంధం ఉంటుందా?
గణేష్ పాత్రకు సినిమాల్లోకి రావాలని ఎంత ప్యాషన్ ఉంటుందో.. దినేష్కి కూడా అంతే ఉంటుంది.
ఇద్దరు హీరోయిన్లతో కెమిస్ట్రీ ఎలా ఉంది?
హెబ్బా పటేల్ గురించి చెప్పాల్సిన పని లేదు. ఆమె అద్భుతంగా నటించారు. సెట్లో ఆమె ఎంతో ఫ్రెండ్లీగా ఉండేవారు. పాయల్ నటన గురించి ఇప్పుడు ప్రేక్షకులు తెలుసుకుంటారు. మా ముగ్గురి మధ్య కెమిస్ట్రీ బాగా కుదిరింది.
చంద్రబోస్ సాహిత్యం మీ సినిమాకు ఎంత మేరకు ఉపయోగపడింది?
చంద్రబోస్ గారు రాసిన పాటలు అద్భుతంగా వచ్చాయి. మా సినిమాకు పాటలు రాస్తున్న టైంలోనే ఆయనకు ఆస్కార్ అవార్డ్ వచ్చింది.
సుభాష్ ఆనంద్ గారి సంగీతం ఎలా ఉంది? ఆయన గురించి చెప్పండి?
సుభాష్ ఆనంద్ గారు ఈ సినిమా తరువాత నెక్ట్స్ లెవెల్కు వెళ్తారు. మా సినిమాకు చాలా మంచి సంగీతాన్ని అందించారు.
దర్శకుడితో పరిచయం ఎలా ఏర్పడింది?
డైరెక్టర్ మారేష్ శివన్ హుషారు సినిమాకు ఆర్ట్ డైరెక్టర్గా పని చేశారు. ఆ మూవీ అయిన ఏడాదికి నా వద్దకు వచ్చి ఈ ప్రాజెక్ట్ గురించి చెప్పారు. కథ నాకు ఆల్రెడీ తెలుసు కాబట్టి వెంటనే ఓకే చెప్పాను.
పెద్ద చిత్రాలతో ఎందుకు పోటీ పడుతున్నారు?
జపాన్, జిగర్ తండా డబుల్ ఎక్స్ వస్తున్నాయని మాకు తెలియదు. అయినా సినిమా బాగుందంటే ఆడియెన్స్ కచ్చితంగా చూస్తారు. మంచి చిత్రాన్ని చూశామనే ఫీలింగ్తో బయటకు వస్తారు. ఈ చిత్రంలో హెబ్బా పాత్రతోనే ఎక్కువగా కనెక్ట్ అవుతారు.