Ajith Kumar: సినిమాలో విలన్ ఫిక్స్!

కోలీవుడ్ బాక్సాఫీస్ రికార్డులను తిరగరాసే నటుడు అజిత్ కుమార్ (Ajith Kumar). ‘వేదళం’, ‘విశ్వాసం’, ‘వలీమై’ సినిమాలతో ప్రేక్షకులను అలరించాడు. అతడు తాజాగా నటించిన చిత్రం తుణివు (Thunivu). మంజు వారియర్ హీరోయిన్‌గా నటించింది. హెచ్. వినోద్ దర్శకత్వం వహించాడు. బోనీ కపూర్ నిర్మించాడు. ఈ చిత్రం బ్యాంక్ దోపిడీ నేపథ్యంలో తెరకెక్కింది. సంక్రాంతి కానుకగా ప్రపంచవ్యాప్తంగా జనవరి 11న విడుదల కానుంది. ‘తుణివు’ తర్వాత అజిత్ నెక్ట్స్ ప్రాజెక్ట్ గతంలోనే ఫిక్సయింది. విఘ్నేశ్ శివన్ దర్వకత్వంలో అతడు నటించనున్నాడు. వర్కింగ్ టైటిల్‌గా ‘ఏకే62’ అని వ్యవహరిస్తున్నారు. ఈ మూవీ షూటింగ్ చెన్నైలో జనవరి 19న ప్రారంభం కానుంది. తాజాగా ఈ సినిమాకు సంబంధించిన ఓ అప్‌డేట్ కోలీవుడ్ మీడియాలో హల్‌చల్ చేస్తుంది. అదేంటంటే..

‘ఏకే62’ ను లైకా ప్రొడక్షన్స్ నిర్మించనుంది. ఈ సినిమాలో విలన్‌గా అరవింద్ స్వామి (Arvind Swami) నటించనున్నాడని తెలుస్తోంది. కమెడియన్ సంతానం కూడా నటించనున్నట్టు సమాచారం. అరవింద్ స్వామి బలమైన ప్రతి నాయక పాత్రలను పోషిస్తూ ఫేమ్ సంపాదించుకున్నాడు. ‘తని ఒరువన్’ (తెలుగులో ధృవ)లోని పాత్ర అతడికీ ఎంత పేరు తీసుకువచ్చిందో అందరికీ తెలిసిందే. ఈ మూవీలో హీరోయిన్ ఛాన్స్ కోసం పలువురు పోటీపడుతున్నట్టు రూమర్స్ హల్‌చల్ చేస్తున్నాయి. త్రిష హీరోయిన్ పాత్ర చేస్తే బాగుంటుందని చిత్ర నిర్మాణ సంస్థ లైకా ప్రొడక్షన్స్ భావిస్తుంది. కానీ, విఘ్నేశ్ శివన్‌, త్రిషకు మధ్య విభేదాలు ఉండటంతో ఆమె నటించడానికి అంగీకరించడం లేదని తెలుస్తోంది. కియారా అడ్వాణీ (Kiara Advani) హీరోయిన్‌గా నటిస్తుందని జోరుగా ప్రచారం జరుగుతుంది. కానీ, పెళ్లి నేపథ్యంలో ఆమె డేట్స్ ఫిబ్రవరిలో అందుబాటులో లేవు. ఈ చిత్రంలో నయనతార హీరోయిన్‌గా చేసే అవకాశాలు ఎక్కువగా ఉన్నాయి.