ఒళ్లు గ‌గుర్పొడిచే డాక్యుమెంట‌రీ.. ఓటీటీలో ఓ కుటుంబంలో గృహిణి జ‌రిపిన దారుణ‌ హ‌త్యాకాండ‌

వారం వారం చాలా సినిమాలు, వెబ్ సిరీస్‌లు వ‌స్తుంటాయి. కానీ చాలా అరుదుగా ఇలాంటి డాక్యుమెంట‌రీస్ వ‌స్తుంటాయి. ఈ మ‌ధ్య జీ5లో వ‌చ్చిన వీర‌ప్ప‌న్ ఎంత సెన్షేష‌న్ సృష్టించిందో తాజాగా నెట్‌ఫ్లిక్స్‌లో వ‌చ్చిన క‌ర్రీ అండ్ సైనేడ్ ది జాలీ జోసెఫ్ కేసు (Curry & Cyanide: The Jolly Joseph Case) అనే గంట 36 నిమిషాల నిడివితో గ‌ల‌ డాక్యుమెంట‌రీ ఓటీటీని షేక్ చేస్తున్న‌ది. మ‌నం మునుపెన్న‌డు చూడ‌ని విధంగా వాస్తవ సంఘటనల ఆధారంగా ఓకే కుటుంబంలో ఓ సాధార‌ణ గృహిణి జ‌రిపిన హ‌త్యా కాండ‌ గురించి ఇందులో కులంక‌శంగా వివ‌రించారు.

తీస్తే సినిమాగా మారే అవ‌కాశాలు పుష్క‌లంగా ఉన్న ఈ క‌థ వింటే ఒళ్లు గ‌గుర్పొవ‌డం ఖాయం. విష‌యానికి వ‌స్తే 2002 నుంచి 2016 మ‌ధ్య కేర‌ళ‌లోని కూడతాయి అనే గ్రామంలో జాలీ జోసెఫ్ (Jolly Joseph) అనే ఓ సాధార‌ణ గృహిణి ఇంట్లోని వారంద‌రితో క‌లుపుగోలుగా,వాళ్లంద‌రికి చేదోడువాదోడుగా ఉంటూనే ఒక‌రికి తెలియ‌కుండా మ‌రోక‌రిని చంపేసింది. ఆస్థి కోసం రెండేండ్ల‌కు ఒక‌రి చోప్పున ఆఖ‌రుకు సొంత భ‌ర్త‌ను కూడా క‌డ‌తేర్చిన ఓ క‌సాయి మ‌హిళ వారిని ఏ విధంగా చంపిందనే నిజ‌జీవిత క‌థ అధారంగా ఈ డాక్యుమెంట‌రీని తెర‌కెక్కించారు.

ఆ త‌ర్వాత ఈ కేసు ఎలా వెలుగులోకి వ‌చ్చింది, పోలీసులు ఎలా చేధించారు, చివ‌ర‌కు ఏమైంద‌నే ఆస‌క్తిక‌రమైన వాస్త‌వ అంశాల‌ను ఆ ఫ్యామిలీ మెంబ‌ర్స్ వాయిస్‌తోనే వివ‌రించారు. ఇదంతా చూశాక ఇలాంటి మ‌హిళ‌లు కూడా ఉంటారా అని మ‌నం ముక్కు మీద వేలేసుకోవ‌డం ఖాయం. ఇప్పుడు ఈ డాక్యుమెంట‌రీని నెట్‌ఫ్లిక్స్ (Netflix)లో డిసెంబ‌ర్ 22 నుంచి మ‌ళ‌యాళంతో పాటు తెలుగు త‌మిళ‌,హిందీ భాష‌ల్లో స్ట్రీమింగ్ అవుతున్న‌ది. మీకు ఏ మాత్రం స‌మ‌యం దొరికినా ఈ కార్య‌క్ర‌మాన్ని చూసేయండి. డోంట్ మిస్‌