GunturKaaram: మళ్ళీ ఆగిపోయిన షూటింగ్, కొత్త తేదీల్లో అయినా అవుతుందా? అసలు ఏమి జరుగుతోంది...
ABN , First Publish Date - 2023-06-08T15:51:17+05:30 IST
అదేదో సామెత చెప్పినట్టు మహేష్ బాబు, త్రివిక్రమ్ శ్రీనివాస్ ల 'గుంటూరు కారం' సినిమా షూటింగ్ మళ్ళీ వాయిదా పడింది. జూన్ 7 నుంచి జరగాల్సిన షూటింగ్ జూన్ 12 కి పోస్టుపోన్ చేశారు. ఈసారైనా సజావుగా సాగుతుందా, లేక పోస్టుపోన్ అంటారా అని ఈ సినిమాలో చెయ్యాల్సిన చాలామంది క్యారెక్టర్ నటులు ఆతృతగా చూస్తున్నారు
మహేష్ బాబు (MaheshBabu), త్రివిక్రమ్ శ్రీనివాస్ (Trivikram Srinivas) కాంబినేషన్ లో వస్తున్న 'గుంటూరు కారం' (GunturKaram) సినిమాకి కష్టాలు ఇంకా తప్పేట్టు కనపడటం లేదు. ఎందుకంటే అప్పుడెప్పుడో మొదలెట్టిన షూటింగ్ ఇంతవరకు ఒక పది శాతం మాత్రమే అయిందని, అందులోంచి బాగున్న కొన్ని సన్నివేశాలను ఏరి కూర్చి, మే 31 కృష్ణ గారి (SuperStarKrishna) పుట్టినరోజు నాడు ఒక టీజర్ గా విడుదల చేశారని పరిశ్రమలో టాక్ నడుస్తోంది. అయితే మళ్ళీ జూన్ 7వ తేదీ నుంచి షూటింగ్ అవ్వాల్సి ఉండగా, మళ్ళీ వాయిదా పడింది అని కూడా తెలిసింది.
ఇలా వాయిదాలు పడటం వలన క్యారెక్టర్ నటుల డేట్స్ తీసుకుంటూ, మళ్ళీ షూటింగ్ లేదని కేన్సెల్ చెయ్యడం వలన ఆ క్యారెక్టర్ ఆర్టిస్టులకు చాలా కోపంగా కూడా ఉందని తెలిసింది. ఎందుకంటే వాళ్ళు ఈ సినిమాకి డేట్స్ ఇవ్వటం, ఆ సమయంలో వేరే సినిమాలు వచ్చినా, త్రివిక్రమ్, మహేష్ కాంబినేషన్ పెద్ద సినిమా కాబట్టి ఈ సినిమాకి ఒప్పుకుంటున్నారు. కానీ తీరా డేట్స్ ఇచ్చాక, షూటింగ్ లేదని చెప్పడం తో తీవ్ర నిరాశ పడుతున్నారు.
అదీ కాకుండా ఆ క్యారెక్టర్ ఆర్టిస్టులకి పరిశ్రమలో రోజువారీ వేతనాలు ఉంటాయి కాబట్టి, ఇలా షూటింగ్ అనటం, ఆలా కేన్సెల్ చెయ్యడంతో వాళ్ళకి అసలు వేతనాలు లేకుండా చేస్తున్నారు అని కూడా ఒక టాక్ నడుస్తోంది. అయితే పెద్ద సంస్థ, పెద్ద బడ్జెట్ సినిమా అగ్ర నటుడు, కాబట్టి ఆ క్యారెక్టర్ నటులు ఏమీ అనకుండా తమ బాధను వేరే సినిమాలో షూటింగ్ లో వున్నప్పుడు తోటి ఆర్టిస్టులతో తమ గోడును చెప్పుకొని బాధపడుతున్నట్టుగా తెలిసింది.
ఇప్పుడు మళ్ళీ 12వ తేదీ నుండి షూటింగ్ చెయ్యాలని అలాగే కొందరి ఆర్టిస్టుల డేట్స్ కూడా ఆ సమయానికి లాక్ చేశారని తెలిసింది. జగపతి బాబు (Jagapathi Babu), ప్రకాష్ రాజ్ (PrakashRaj) లాంటి పెద్ద క్యారెక్టర్ నటుల డేట్స్ కూడా తీసుకొని రెండు మూడు సార్లు కేన్సెల్ చెయ్యడంతో వాళ్ళకి కూడా కొంచెం కోపం వచ్చినా, ఏమీ అనలేక వూరుకున్నారని కూడా తెలిసింది. ఇప్పుడు 12 నుండి నలుగురు అయిదుగురు క్యారెక్టర్ నటులు ఉంటారని, అలాగే పూజ హెగ్డే (PoojaHegde) కూడా ఈసారి ఎంటర్ అవుతుందని కూడా తెలిసింది. అయితే ఇప్పుడైనా సజావుగా అవుతుందా, లేక మళ్ళీ వాయిదా పడుతుందా అని పరిశ్రమలో టాక్ నడుస్తోంది.
పరిశ్రమలో మహేష్ బాబు, త్రివిక్రమ్ శ్రీనివాస్ సినిమా షూటింగ్ ఒక జోక్ లా అయిపోయిందని, షూటింగ్ అని అంటారు కానీ జరగటం లేదు అని అందువల్ల పరిశ్రమలో ఈ సినిమా గురించి చర్చ జోరుగా సాగుతోంది. ప్రొడక్షన్ సంస్థ, త్రివిక్రమ్ శ్రీనివాస్, మహేష్ బాబుల మధ్య ఎదో జరిగిందని, ఏమైంది అన్న విషయం మాత్రం బయటకు రావటం లేదని, కానీ ఇలా షూటింగ్ పోస్టుపోన్ చేసుకుంటూ వెళితే అనుకున్నట్టుగా జనవరి లో సంక్రాంతి కి విడుదల డౌట్ అని అంటున్నారు. మళ్ళీ మహేష్ బాబు జులై 16 నుండి ఒక నెల పాటు విదేశాలకు వెకేషన్ కి వెళ్ళిపోతాడని కూడా అంటున్నారు.