టిక్‌టాక్‌ వీడియోలతో హీరోయిన్‌ అవుతావా? అన్నారు!
ABN , First Publish Date - 2023-07-12T01:36:55+05:30 IST
‘తొలిప్రేమ అనేది జీవితంలో ఎప్పటికీ అందంగా అద్భుతంగా ఉంటుంది. ఎన్నేళ్లైనా జీవితంలో మధురానుభూతిగా మిగిలిపోతుంది. ‘బేబీ’ సినిమాతో అదే చెప్పబోతున్నాం’అని వైష్ణవీ చైతన్య ...
‘తొలిప్రేమ అనేది జీవితంలో ఎప్పటికీ అందంగా అద్భుతంగా ఉంటుంది. ఎన్నేళ్లైనా జీవితంలో మధురానుభూతిగా మిగిలిపోతుంది. ‘బేబీ’ సినిమాతో అదే చెప్పబోతున్నాం’అని వైష్ణవీ చైతన్య అన్నారు. యూట్యూబర్‌గా తన ప్రయాణం ప్రారంభించిన ఈ తెలుగు అమ్మాయి ‘బేబీ’తో హీరోయిన్‌గా మారింది. ఆనంద్‌ దేవరకొండ, విరాజ్‌ అశ్విన్‌ హీరోలుగా సాయిరాజేశ్‌ దర్శకత్వం వహించారు. ఈ నెల 14న విడుదలవుతున్న సందర్భంగా వైష్ణవీ చైతన్య సినిమా విశేషాలను మీడియాతో పంచుకున్నారు.
హీరోయిన్‌ అవ్వాలనే కోరికతో పరిశ్రమకు వచ్చాను. సినీ రంగంలో నా ప్రయాణం మొదలై ఎనిమిదేళ్లు. ‘బేబీ’ లాంటి మంచి చిత్రంలో అవకాశం వస్తుందనుకోలేదు. కథ విన్నప్పుడు షాక్‌ అయ్యాను. నాకు ఒక మంచి అవకాశం లభించిందనుకున్నాను. ఈ పాత్రను నేను చేయగలనా? లేదా? అనే సంశయం కలిగిన ప్పుడు సాయిరాజేశ్‌ గారు ‘నువ్వు చేయగలవు’అని వెన్నుతట్టి ప్రోత్సహించారు.
ప్లాట్‌ఫామ్‌ ఏదైనా న టీనటుల అంతిమలక్ష్యం సినిమాల్లో గుర్తింపు తెచ్చుకోవడమే. ఇన్‌స్టా, టిక్‌టాక్‌ వీడియోలు చేసి, సినిమా హీరోయిన్‌ అవుతావా? అని విమర్శలు వచ్చాయి. అవి నా మీద ప్రభావం చూపాయి కూడా. నా లక్ష్యాన్ని గుర్తుచేసుకుంటూ ముందుకెళ్లాను.
‘బేబీ’ చిత్రంలో బస్తీలో పెరిగే ఓ అమాయక అమ్మాయి పాత్ర పోషించాను. బస్తీ నుంచి పట్ణణానికి వచ్చిన తర్వాత ఆ అమ్మాయి జీవితం ఎలాంటి మలుపు తిరిగిందనేది కథ. తను చిన్ననాటి స్నేహితుడితో ప్రేమలో ఉంటుంది. కాలేజ్‌లో చేరాక అక్కడ మరో అబ్బాయి ఆమె జీవితంలోకి వస్తాడు. ఆ తర్వాత ఆ అమ్మాయి జీవితం ఎలాంటి మలుపు తీసుకుందనేది ఆసక్తికరంగా ఉంటుంది.
చాలా డెప్త్‌ ఉన్న సన్నివేశాలు సినిమాలో ఉన్నాయి. ఇలాంటి పాత్ర నన్ను వెతుక్కుంటూ వచ్చినందుకు గర్వంగా ఉంది. ప్రాణం పెట్టి నటించాను. సినిమాలో కొన్ని సన్నివేశాలు మన జీవితంలో తారసపడినట్లే అనిపిస్తాయి. ప్రయత్నం చేస్తే తెలుగు అమ్మాయిలకు కూడా హీరోయిన్లుగా అవకాశాలు వస్తాయి, ఇక్కడ ఎలాంటి వివక్ష లేదు అనేది నా నమ్మకం.