వర్షంలో కూడా థియేటర్లకు వస్తున్నారు

‘‘హిడింబ విషయంలో మేం అనుకొన్నవన్నీ జరిగాయి. నిర్మాతలు హ్యాపీగా ఉన్నారు. సినిమా కొన్నవాళ్లందరికీ మంచి డబ్బులు వస్తున్నాయ’’న్నారు అశ్విన్‌బాబు. ఆయన కథానాయకుడిగా నటించిన చిత్రం ‘హిడింబ’. గంగపట్నం శ్రీధర్‌ నిర్మించారు. అనిల్‌ కన్నెగంటి దర్శకత్వం వహించిన ఈ చిత్రం ఇటీవలే ప్రేక్షకుల ముందుకు వచ్చింది. శనివారం హైదరాబాద్‌లో ఏర్పాటు చేసిన సక్సెస్‌ మీట్‌లో అశ్విన్‌బాబు మాట్లాడుతూ ‘‘కుటుంబ ప్రేక్షకులు సైతం ఈ థ్రిల్లర్‌ని ఆదరించడం చాలా ఆనందంగా ఉంది. విశ్రాంతి తరవాత వచ్చే సన్నివేశాల్ని ఎవరూ మిస్‌ అవ్వకండి. ఎందుకంటే ఈ సీన్‌లోనే స్ర్కీన్‌ ప్లే టెక్నిక్‌ దాగుంద’’న్నారు. ‘‘రక్తాన్ని భయం లేకుండా చూపించిన సినిమా ఇది. వర్షాలు పడుతున్నా సరే, ప్రేక్షకులు థియేటర్లకు వస్తున్నారు. మమ్మల్ని ఆదరిస్తున్నార’’ని దర్శకుడు తెలిపారు.