Bollywood Badshah: షారూఖ్ ఖాన్ రెండు వరుస హిట్స్ తో రికార్డ్
ABN , First Publish Date - 2023-09-29T18:02:36+05:30 IST
అతన్ని అందరూ బాలీవుడ్ బాద్ షా అంటారు లేదా కింగ్ ఖాన్ అంటారు, ఆ పేర్లకి తగ్గట్టుగా షారుఖ్ ఖాన్ ఈ సంవత్సరం ఒక అరుదైన చరిత్ర సృష్టించారు. ఒకే సంవత్సర రెండు సినిమాలు విడుదలవటమే కాకుండా, కలెక్షన్ల పరంగా కూడా చరిత్ర సృష్టించారు. అందులో ఒక సినిమా 'జవాన్' ఇప్పుడు నెంబర్ వన్ సినిమాగా వుంది.
భారతీయ సినిమా పరిశ్రమలో ఎవరికీ సాధ్యం కాని రికార్డును సుసాధ్యం చేసుకున్న ఏకైక నటుడు కింగ్ ఖాన్ షారూఖ్ (ShahRukhKhan). ఈ అరుదైన రికార్డును ఆయన ఒకే ఏడాదిలోనే అదీ ఈ సంవత్సర సాధించటం విశేషం. ఇంకా మూడో సినిమా 'డంకి' #Dunki కూడా ఈ సంవత్సరమే విడుదలకి సిద్ధం అయింది. ఇలా మూడు సినిమాలు ఒకే సంవత్సరంలో ఒక పెద్ద నటుడువి విడుదల అవటం కూడా షారుఖ్ ఒక అరుదైన ఘనతగా సాధించారు అని అంటున్నారు.
‘జవాన్’ #Jawan సినిమాతో వరుసగా రెండో సారి టాప్ గ్రాసర్ సాధించిన నటుడిగా షారుఖ్ నిలిచారు. అంతే కాకుండా రూ.600 కోట్ల కలెక్షన్స్ సాధించిన తొలి సినిమాగా రికార్డ్ క్రియేట్ చేసింది. సెప్టెంబర్ 7న విడుదలైన ఈ చిత్రం ఇప్పటికీ సూపర్బ్ కలెక్షన్స్‌ను సాధిస్తూ దూసుకెళ్తోంది. శుక్రవారం 'జవాన్' #Jawan సినిమా హిందీ చలన చిత్ర చరిత్రలో టాప్ గ్రాసర్ మూవీగా చరిత్ర సృష్టించి ఓ బెంచ్ మార్క్‌ను సెట్ చేసింది. ఈ సినిమా విడుదలైన రోజు నుంచి బాక్సాఫీస్ దగ్గర రికార్డ్ వసూళ్లను సాధిస్తూ చరిత్ర సృష్టించే దిశగా వెళుతోంది, అలాగే సరికొత్త రికార్డులను వసూళ్ల పరంగా ఈ చిత్రం సెన్సేషన్ క్రియేట్ చేస్తోంది.
హిందీ సినిమాల పరంగా రూ. 525.50 కోట్లు, ఇండియన్ బాక్సాఫీస్ దగ్గర రూ.584.32 కోట్లను సాధించిన 'జవాన్' సినిమా ప్రపంచ వ్యాప్తంగా రూ.1043.21 కోట్లకు వసూళ్లను రాబట్టి అన్ని రికార్డులను బద్దలు కొట్టింది. ఈ భారీ కలెక్షన్స్‌ను ఈ చిత్రం కేవలం 22 రోజుల్లోనే సాధించటం విశేషం. ప్రతీ వారం కొత్త సినిమాలు విడుదలవుతున్నప్పటికీ వాటి ప్రభావం 'జవాన్' సినిమాపై పడలేదు. ఈరోజుల్లో వారం తరువాత పడిపోతున్న కలెక్షన్స్ చూస్తున్నాం, కానీ మూడో వారంలో కూడా 'జవాన్' ప్రభావం బాక్స్ ఆఫీస్ దగ్గర ఇంకా వుంది.