Prabhas: ‘రాజా డీలక్స్‌’ లో సంజయ్ దత్!

‘బాహుబలి’ ప్రాంచైజీతో ప్రపంచవ్యాప్తంగా అభిమానులను సంపాదించుకున్న నటుడు ప్రభాస్ (Prabhas). ఈ సినిమా తర్వాత అతడి నుంచి ‘రాధే శ్యామ్’, ‘సాహో’ వచ్చినా ప్రేక్షకులను నిరాశపరిచాయి. అయినప్పటికీ, డార్లింగ్ తన జోష్‌ను మాత్రం తగ్గించలేదు. వరుసగా ప్రాజెక్టులను పట్టాలెక్కిస్తూ ఫుల్ బిజీ‌గా ఉన్నాడు. ‘ఆది పురుష్’ షూటింగ్‌ను ఇప్పటికే పూర్తి చేశాడు. ‘సలార్’, ‘ప్రాజెక్టు-కె’ సినిమాలు చిత్రీకరణ దశలో ఉన్నాయి. ఈ చిత్రాలు షూటింగ్ దశలో ఉండగానే మారుతి (Maruthi)తో ప్రాజెక్టును పట్టాలెక్కించాడు. ప్రభాస్, మారుతి సినిమాకు సంబంధించిన ఓ అప్‌డేట్ ఫిల్మ్‌నగర్‌లో చక్కర్లు కొడుతుంది. ఈ మూవీలో ఓ బాలీవుడ్ నటుడు నటించనున్నాడని రూమర్స్ హల్‌చల్ చేస్తున్నాయి.

ప్రభాస్, మారుతి సినిమాకు ‘రాజా డీలక్స్’ (Raja Deluxe) అనే టైటిల్ ప్రచారంలో ఉంది. ఈ చిత్రంలో బాలీవుడ్ నటుడు సంజయ్ దత్ (Sanjay Dutt) నటించనున్నాడని వదంతులు షికార్లు కొడుతున్నాయి. ప్రభాస్ తాత పాత్రలో కనిపించనున్నాడని సమాచారం అందుతుంది. గతంలో సంజయ్ దత్ ‘కెజియఫ్‌2’ లో అధీర పాత్రలో కనిపించాడు. ఈ చిత్రంలో విలన్ పాత్రలో కనిపించి ప్రేక్షకులను అలరించాడు. ‘రాజా డీలక్స్’ హార్రర్ కామెడీగా తెరకెక్కనున్నట్టు తెలుస్తోంది. ఈ సినిమాను మేకర్స్ ఇప్పటి వరకు అనౌన్స్ చేయలేదు. అయినప్పటికి, జెట్ స్పీడ్‌లో షూటింగ్‌ను కొనసాగిస్తున్నారు. తాజాగా రెండో షెడ్యూల్ ప్రారంభమైంది. హైదరాబాద్‌లో ప్రత్యేకంగా వేసిన ఓ ఇంటి సెట్లో ఈ చిత్రానికి సంబంధించిన షూటింగ్ జరుగుతుంది. ఈ చిత్రంలో మాళవిక మోహనన్, నిధి అగర్వాల్, రిద్ది కుమార్ హీరోయిన్స్‌గా నటిస్తున్నారు. ఈ సినిమాను 2024 సంక్రాంతి కానుకగా విడుదల చేయాలనే ఆలోచనలో మేకర్స్ ఉన్నారు.