Chinmayi Sripaada: అతను మంచోడు కాదు.. జాగ్రత్త!

గతంలో మీటూ ఉద్యమంలో భాగంగా కోలీవుడ్‌ రచయిత వైరాముత్తుపై ఆరోపణలు చేశారు గాయని, డబ్బింగ్‌ ఆర్టిస్ట్‌ చిన్మయి. విదేశాల్లో ప్రోగ్రామ్‌ కోసం వెళ్లినప్పుడు వైరాముత్తు తనని వేధింపులకు గురి చేశాడని, మంచివాడు కాదని మీటూ వేదికగా ఆమె కామెంట్స్‌ చేశారు. అతడు చెప్పిన మాటలు విననందుకు తన కెరీర్‌పైనే దెబ్బ కొట్టాడని ఆమె గతంలో ఆరోపించారు. ఇటీవల తమిళ నటి అర్చన వైరాముత్తును కలిశానంటూ సోషల్‌ మీడియాలో ఓ ఫొటో షేర్‌ చేశారు. దీనిపై చిన్మయి స్పందించారు. ‘‘మొదట ‘ఇలాగే మొదలవుతుంది. దయచేసి అప్రమత్తంగా ఉండు. వీలైనంత వరకూ అతనికి దూరంగా ఉండటానికి ట్రై చెయ్యి. నీ పక్కన వేరే వ్యక్తులు లేకుండా ఒక్కదానివే వెళ్లి ఆయన్ను కలవకు’’ అని పేర్కొన్నారు. తమిళంలో ‘రాజా రాణీ’ అనే సీరియల్‌తో ప్రేక్షకులకు చేరువైన అర్చన తాజాగా ఓ సినిమా అవకాశం అందుకున్నారు. ఆ షూటింగ్‌ సెట్‌లో ఉన్న వైరాముత్తుని కలిసి ఫొటోలు దిగారు. ‘‘షూట్‌లో గొప్ప రచయిత వైరాముత్తును కలిశాను. ఎంతో ఆనందంగా ఉంది’’ అని అర్చన ఇన్‌స్టా వేదికగా షేర్‌ చేశారు. దీనికి చిన్మయి స్పందించారు. ప్రస్తుతం చిన్మయి కామెంట్స్‌ వైరల్‌ అవుతున్నాయి.