Pawan Kalyan: లిస్ట్‌లోకి మరో సినిమా

టాలీవుడ్ స్టార్ హీరోల్లో పవర్ స్టార్ పవన్ కల్యాణ్ (Pawan Kalyan) ఒకరు. చివరగా ‘భీమ్ల నాయక్’ లో నటించాడు. ఈ చిత్రం బాక్సాఫీస్ వద్ద సంచలన విజయం సాధించింది. భారీ స్థాయి వసూళ్లను రాబట్టింది. ప్రస్తుతం పవన్ ‘హరి హర వీర మల్లు’ లో నటిస్తున్నాడు. పీరియాడిక్ బ్యాక్‌డ్రాప్‌లో ఈ చిత్రం తెరకెక్కుతుంది. పాన్ ఇండియాగా రూపొందుతుంది. పవర్ స్టార్ ఈ మూవీలో బందిపోటు పాత్రను పోషిస్తున్నాడు. నిధి అగర్వాల్ హీరోయిన్‌గా నటిస్తుంది. బాబీ డియోల్ కీలక పాత్రను పోషిస్తున్నాడు. ఈ మూవీ షూటింగ్ పూర్తి కాక ముందే పవన్ కల్యాణ్ రెండు సినిమాలను ప్రకటించాడు. తాజాగా మరో ప్రాజెక్టుకు కూడా సై అన్నాడని ఫిలిం నగర్ వర్గాలు తెలుపుతున్నాయి.

సుజిత్‌తో సినిమా చేయనున్నట్టు పవర్ స్టార్ కొన్ని రోజుల క్రితమే తెలిపాడు. అధికారిక ప్రకటన కూడా వచ్చింది. ఈ చిత్రంలో గ్యాంగ్ స్టర్‌ పాత్రలో కనిపించనున్నాడు. జపనీస్ బ్యాక్ డ్రాప్‌లో చిత్రం రూపొందుతుంది. హరీశ్ శంకర్ డైరెక్షన్‌లో ‘ఉస్తాద్ భగత్ సింగ్’ లో నటించడానికి ఇప్పటికే అంగీకరించాడు. ఈ ప్రాజెక్టు ఇప్పటికే పూజా కార్యక్రమాలు జరుపుకొంది. ఈ సినిమాల షూటింగ్ మొదలు కాక మునుపే మరో దాంట్లో అంగీకరించడానికి సై అన్నాడు. ‘వినోదాయ సీతం’ (Vinodhaya Sitham) రీమేక్‌లో నటించడానికి రెడీ అన్నాడని సమాచారం. వచ్చే ఏడాది జనవరి నుంచి ఈ మూవీ షూటింగ్ ప్రారంభం కానుందని తెలుస్తోంది. గతంలో ఈ ప్రాజెక్టు ఆగిపోయిందని రూమర్స్ హల్‌చల్ చేశాయి. కానీ, ప్రస్తుతం అందుతున్న సమాచారంతో ఈ సినిమా త్వరలోనే పట్టాలెక్కే అవకాశం ఉంది. ఈ చిత్రంలో సాయి ధరమ్ తేజ్ కీలక పాత్రను పోషిస్తున్నాడు. పీపుల్ మీడియా ఫ్యాక్టరీ నిర్మించనుంది.