Boycott Pathaan: షారుఖ్ సినిమాని బాయ్‌కాట్ చేయాలంటూ ట్రోలింగ్.. అంతా దీపికా వల్లే..

చాలా గ్యాప్ తర్వాత బాలీవుడ్ స్టార్ షారుఖ్ ఖాన్ (Shah Rukh Khan) నటిస్తున్న తాజాగా చిత్రం ‘పఠాన్’ (Pathaan). సిద్ధార్థ్ ఆనంద్ దర్శకత్వం వహిస్తున్న ఈ చిత్రంలో టాప్ హీరోయిన్ దీపికా పదుకొనే (Deepika Padukone) నటించింది. దీనికి సంబంధించిన పోస్టర్స్, టీజర్స్ విడుదలై మంచి రెస్పాన్స్‌ని అందుకున్నాయి. ఈ తరుణంలో ఇటీవలే ఓ వీడియో సాంగ్‌ ‘బేషరమ్ రంగ్’ని చిత్రబృందం విడుదల చేసింది. ఈ వీడియో ప్రస్తుతం యూట్యూబ్‌లో ట్రెండింగ్ అవుతోంది.

అయితే.. అందులో దీపికా బికీనీలో కనిపిస్తుంది. ఇది చాలామంది నెటిజన్ల కోపానికి కారణమైంది. ఓ వైపు షారుఖ్‌, దీపిక కెమిస్ట్రీని కొందరు ప్రశంసిస్తుండగా.. మరికొందరు విమర్శలు చేస్తున్నారు.

‘మహిళలు, వెళ్లి మీకు ఏది అనిపిస్తే అది ధరించండి. మిమ్మల్ని శాసించే అధికారం పురుషులకు లేదు. కానీ సినిమా వ్యాపారం కోసం మరి ఇలా అవసరం లేదు’ అని కొందరు.. ‘ఇలాంటి బట్టలు వేసుకోడం కళ కాదు.. సంస్కృతి కాదు.. ఇలాంటివి చూడటానికి సినిమాకి వెళ్లను’ అని మరికొందరు.. ‘ఇండియాలో ఈ సినిమాని బ్యాన్ చేయాలి’ అంటూ కొందరు పోస్టులు పెడుతున్నారు.

‘ది కాశ్మీర్ ఫైల్స్’ దర్శకుడు వివేక్ అగ్నిహోత్రి ఈ పాటని విమర్శిస్తూ ఓ పోస్ట్ పెట్టాడు. ‘ఇంతకుముందు ఇన్‌స్టా రీల్స్ బాలీవుడ్ పాటలకి చెడ్డ కాపీలుగా కనిపించేవి. ఇప్పుడు బాలీవుడ్ పాటలు ఇన్‌స్టా రీల్స్‌కు చెడ్డ కాపీలుగా కనిపిస్తున్నాయి’ అని రాసుకొచ్చాడు. కాగా.. ‘పఠాన్’ మూవీ జనవరి 25, 2023న సినిమాల్లో విడుదల కానుంది.