పనామా పేపర్స్ లీక్స్ కేసులో ఐశ్వర్యరాయ్‌ని.. ఈడీ ఏమని ప్రశ్నించిందంటే..

బాలీవుడ్ అందాల తార ఐశ్వర్యరాయ్ బచ్చన్‌ ‘పనామా పేపర్స్ లీక్స్‌’ కేసులో ఎన్‌ఫోర్స్‌మెంట్ డిపార్ట్‌మెంట్ ముందు విచారణకు హాజరైన విషయం తెలిసిందే. 2016లో ఎంతో సంచలనం సృష్టించిన ఈ కేసుతో ఎంతోమంది ప్రముఖులకు సంబంధం ఉన్నట్లు అప్పట్లో వార్తలు హల్ చల్ చేశాయి. అప్పటి నుంచి చాలామందిని ఎంక్వైరీ చేసింది ఈడీ. కాగా ఓ ఫేక్ కంపెనీతో ఐశ్వర్యకి సంబంధం ఉన్నట్లు అనుమానించిన ఈ శాఖ చాలా రోజులుగా ఆమెను విచారించడానికి ప్రయత్నిస్తోంది.

అయితే, ఇప్పటికే వివిధ కారణాల వల్ల రెండుసార్లు విచారణకు హాజరు కాలేదు ఐశ్వర్య. కానీ డిసెంబర్ 20న మాత్రం ఢిల్లీలోని హెడ్ క్వార్టర్స్‌లో ఈడీ అడిగిన పలు ప్రశ్నలకు సమాధానం చెప్పింది ఈ భామ. కాగా, విచారణకు హాజరైన ఈ తారని ఆ శాఖ ఏమని ప్రశ్నించిందంటే..

బ్రిటిష్ వర్జిన్ ఐలాండ్స్‌లో 2005లో రిజిస్టరైన అమిక్ పార్టనర్స్ కంపెనీకి, మీకు సంబంధం ఏంటి?

మొసాక్ ఫోన్సెకా కంపెనీని రిజిస్టర్ చేసిన న్యాయ సంస్థ మీకు తెలుసా?

ఈ కంపెనీ డైరెక్టర్లలో మీరు, మీ నాన్న కోటేదాడి రమణ రాయ్ కృష్ణ రాయ్, మీ తల్లి కవితా రాయ్, మీ సోదరుడు ఆదిత్య రాయ్ ఉన్నారు. దీని గురించి ఏం చెబుతారు?

ప్రారంభంలో చెల్లించిన క్యాపిటల్ 50,000 డాలర్లు. 1 డాలరు విలువ చేసే 12,500 షేర్లు  ఒక్కో డైరెక్టర్‌కి ఉన్నాయి. మొదట డైరెక్టర్‌గా ఉన్న మీరు అనంతరం ఎందుకు వాటాదారు అయ్యారు?

జూన్ 2005లో మీరు కేవలం వాటాదారుగా ఎందుకు మారారు?

2008 నుంచి ఆ కంపెనీ ఎందుకు పనిచేయట్లేదు?

ఆర్థిక లావాదేవీల కోసం ఆర్‌బీఐ అనుమతి తీసుకున్నారా? 

అంటూ పలు ప్రశ్నలను అడిగినట్లు సమాచారం. అయితే వీటికి ఐశ్వర్య ఏం సమాధానాలు ఇచ్చిందో తెలియరాలేదు.